Perızat Qaırat 10 jylǵa bas bostandyǵynan aıyryldy, dep habarlaıdy Aqshamnews.kz.
Elorda soty qoǵamda úlken rezonans týdyrǵan Perızat Qaırat isi boıynsha úkim shyǵardy. Ol alaıaqtyq jáne qylmystyq jolmen alynǵan aqshany zańdastyrý baptary boıynsha kináli dep tanyldy.
Sot Perızat Qaıratty 10 jylǵa bas bostandyǵynan aıyrýǵa úkim etti. Onyń anasy - Ǵaını Alashbaeva 8 jylǵa sottaldy.
Úsh epızod boıynsha aıyptaýlar taǵaıyndaldy:
— múmkindigi shekteýli balalarǵa kómek kórsetý úshin jınalǵan qarajatty;
— Taıaý Shyǵysta zardap shekkenderge arnalǵan gýmanıtarlyq kómekti;
— Qazaqstandaǵy sý tasqynynan zardap shekkenderge arnalǵan qaıyrymdylyq aqshasyn jymqyrý.
Sot aıyptalýshylardy Qylmystyq kodekstiń kelesi baptary boıynsha kináli dep tanydy:
-
asa iri kólemdegi alaıaqtyq;
-
aldyn ala sóz baılasý arqyly adamdar toby jasaǵan, qylmystyq jolmen alynǵan tabysty zańdastyrý;
-
asa iri kólemdegi tabysty jasyrý jáne zańdastyrý.
Perızat Qaırat pen onyń anasynyń jáne advokatynyń sońǵy sózderi jabyq sot otyrysynda tyńdaldy. Buǵan deıin qorǵaýshylar aıyptalýshylardyń kinásizdigin dáleldeıtin bultartpas aıǵaqtar bar ekenin aıtqan bolatyn.
Perızat Qaırat ózine taǵylǵan aıyptarmen kelispeıtinin málimdedi.
Perızat Qaırat isi
Perızat Qaırat – Qazaqstandaǵy qoǵam belsendisi ári kásipker. Ol 2021 jylǵy maýsymda qurylǵan qaıyrymdylyq qordyń negizin qalaýshy jáne basshysy retinde tanymal.
2024 jylǵy qarashada Perızat Qaırat 1,5 mıllıard teńgeden astam qarajatty jymqyrdy degen kúdikpen ustaldy. Bul qarajat sý tasqynynan zardap shekkenderge kómek kórsetý maqsatynda jınalǵan bolatyn. Tergeý málimetinshe, qarajattyń bir bóligi jeke maqsattarǵa – jyljymaıtyn múlik, avtokólik jáne qymbat sheteldik saparlarǵa jumsalǵan.
Sondaı-aq Perızat Qaırattyń qor qarajatyn qolma-qol aqshaǵa aınaldyrý úshin dos-jarandary men týystaryn tartqany jáne olarǵa bul qyzmetteri úshin syıaqy tólegeni de aıtylǵan.