Keremet páter taptyńyz: keń, jaryq, terezeden ádemi kórinis ashylady, baǵasy da tıimdi. Mundaı usynystan bas tartý qıyn. Alaıda, alǵashqy kózqarasta tıimdi kóringen mámile alaıaqtardyń aıla-tásili bolýy múmkin. Bul týraly Aqshamnews.kz saıty habarlaıdy.
Jyljymaıtyn múlik salasyndaǵy sarapshylar Center Home marketpleısi arqyly eń jıi kezdesetin 5 alaıaqtyq sqemasyn anyqtap, olardan qorǵaný joldaryn usyndy.
«Bul páterdi satyp/jalǵa berip qoıdyq» sqemasy
Bul – eń tanymal ádisterdiń biri. Klıent ınternetten óte tartymdy baǵamen páterdi kórip, jalǵan «ıesi» nemese «rıeltorymen» baılanysqa shyǵady. Biraq áńgime barysynda ol páterdiń satylyp nemese jalǵa berilip qoıǵany aıtylady.
Alaıaq eksklúzıvti usynystar bazasyna qol jetkizý úshin aldyn ala tólem jasaýdy suraıdy. Aqsha túskennen keıin «rıeltor» baılanysqa shyqpaı qoıady, al «jeke baza» eshqashan usynylmaıdy.
Qalaı qorǵaný kerek?
«Eksklúzıvti» usynystar úshin aqsha tólemeńiz
Rıeltordan resmı qujattardy talap etińiz
Tek resmı agenttikterdiń qyzmetin paıdalanyńyz
«Aldyn ala tólem jasasańyz, páter sizdiki» sqemasy
Bul sqema boıynsha sapaly fotolary bar jalǵan habarlandyrý jarıalanady. Qyzyǵýshylyq tanytqan adamdarǵa «páterdi kórý múmkin emes, biraq ony brondaý úshin aldyn ala tólem jasaý kerek» dep aıtylady.
Alaıaq 10 000-nan 100 000 teńgege deıin depozıt surap, tólem alǵannan keıin nómirin buǵattaıdy.
Shymkentte 21 jastaǵy alaıaq qyz dál osyndaı ádispen Almatydaǵy elıtalyq turǵyn úılerdiń jalǵan habarlandyrýlaryn jarıalap, birneshe adamnan tolyq aılyq tólem alǵan.
Qalaı qorǵaný kerek?
Kelisimshartsyz eshqandaı aldyn ala tólem jasamańyz
Páterdi óz kózińizben kórmeı aqsha bermeńiz
Eger baǵa tym tómen bolsa – bul alaıaqtyq belgisi
«Jalǵa berý nemese satý ıesinen emes» sqemasy
Alaıaqtar kúndik jalǵa alynǵan páterdi ózderiniki retinde kórsetip, uzaq merzimge jalǵa berý nemese satylymǵa shyǵarady. Olar jalǵan qujattar daıyndap, birneshe adammen kelisimshart jasasyp, aldyn ala tólem, depozıt jáne alǵashqy aılyq tólemdi alyp, joǵalyp ketedi.
Nátıjesinde bir páterde birneshe «jaldaýshy» paıda bolady, al naǵyz páter ıesi múldem beıhabar bolyp shyǵady. Keıbir alaıaqtar tipti jalǵan qujattarmen páterdi satyp jiberýge deıin barady.
Qalaı qorǵaný kerek?
Tek páter ıesimen nemese resmı senimhaty bar adammen kelisimshart jasasyńyz
Qujattardy muqıat tekserińiz, onyń ishinde menshik quqyǵyn rastaıtyn qujattardy
Kelisimshartty notarıýs arqyly rásimdeńiz
«Sizge ketýge týra keledi» sqemasy
Bul sqema kóbinese páter ıeleriniń alaıaqtyǵy bolyp tabylady. Olar «tómen baǵamen, biraq jóndeý jasaýmen» uzaq merzimge jalǵa beredi. Jóndeý aıaqtalǵan soń kvartıranttan qutylý jolyn izdeıdi.
Keıbir jaǵdaılarda páter ıesi kepildik depozıtti qaıtarmaıdy, jıhaz nemese tehnıkanyń buzylǵanyn syltaý etip, qarjylyq shyǵynǵa ushyratady.
Qalaı qorǵaný kerek?
Jóndeý jasaýdy óz mindetińizge almańyz
Kelisimshartqa jóndeý boıynsha barlyq sharttardy engizińiz
Turǵyn úı jaǵdaıyn jáne barlyq múlikti foto/vıdeoǵa túsirińiz
«Bar, biraq basqa páter» sqemasy
Habarlandyrýda bir páter kórsetiledi, biraq kelgende múldem basqa, nashar jaǵdaıdaǵy turǵyn úı usynylady.
Baǵasy tym tómen, ornalasýy yńǵaıly páterler – kóbinese osyndaı «jarnama ilmegi» bolyp shyǵady.
Qalaı qorǵaný kerek?
Sizge basqa páter usynsa – birden bas tartyńyz
Kelisimshartty tek kórgen páterge qatysty jasasańyz
Turǵyn úıge qatysty barlyq málimetterdi qujat júzinde bekitińiz
Qaýipsizdik erejeleri: páter jaldaý nemese satyp alý kezinde ne isteý kerek?
Kelisimshart jasaspaı aqsha aýdarmańyz
Qujattardy muqıat tekserińiz (jeke kýálik, menshik quqyǵy)
Jyljymaıtyn múlikke qatysty notarıaldy rastalǵan kelisim jasańyz
Eger «tym tıimdi» usynys bolsa – alaıaqtyq bolýy múmkin
Center Home sarapshylary:
İshki túısigińizge senińiz. Eger kúdik týsa, mámileden bas tartqan durys.