Beıbit kelissózder Kavkazǵa uzaq merzimdi beıbitshilik ákeledi
Armenıa Taýly Qarabaqty Ázirbaıjannyń bir bóligi dep tanýǵa daıyn, dep málimdedi Armenıa Premer-mınıstri Nıkol Pashınán. Ol armán halqynyń quqyqtary saqtalsa ǵana osyndaıǵa daıyn ekendikterin aıtty, dep habarlaıdy Almaty-akshamy.kz Zakon.kz-ke silteme jasap.
Bul týraly ol baspasóz máslıhatynda málimdedi, dep habarlaıdy TASS.
"86,6 myń sharshy shaqyrymǵa Taýly Qarabaq ta kiredi. Sonymen qatar, Taýly Qarabaqtaǵy armándardyń quqyqtary men qaýipsizdigi máselesi Baký-Stepanakert formatynda talqylanýy kerektigin aıtyp otyrmyz", - dedi ol.
Óz kezeginde Ázirbaıjan Prezıdenti Ilham Álıev te Ázirbaıjan men Armenıa arasynda beıbit kelissózder júrgizý "saıyp kelgende Kavkazǵa uzaq merzimdi beıbitshilik ákeledi" dep úmittenin jetkizdi.
Mamyr aıynyń basynda Armenıa men Ázirbaıjannyń Syrtqy ister mınıstrleri Ararat Mırzoıan men Djeıhýn Baıramov AQSH-tyń Arlıngton qalasynda kezdesti. 4 mamyrda AQSH Memlekettik hatshysy Entonı Blınken taraptar beıbit kelisimge kelý jolynda aıtarlyqtaı progreske qol jetkizgenin málimdedi. 17 mamyrda Pashınán muny 14 mamyrda Brússelde Eýropalyq keńes basshysy Charlz Mısheldiń araǵaıyndyq tanytýymen Ázirbaıjan Prezıdenti Ilham Álıevpen bolǵan kelissózderdegi progresti kórsete otyryp rastady.
Qarabaq qaqtyǵysy 1988 jyly aqpanda Taýly Qarabaq avtonomıalyq oblysy Ázirbaıjan KSR quramynan shyǵatynyn jarıalaǵan kezden bastaldy. 1992-1994 jyldardaǵy qarýly qaqtyǵystyń nátıjesinde Ázirbaıjan Taýly Qarabaqty jáne oǵan irgeles jeti aýdandy ýysynan shyǵaryp aldy. Odan keıin qaqtyǵys dúrkin-dúrkin tóbe kórsetip otyrdy, eki el shekarasynda atys bolyp, shıelenister de arakidik burq ete túsetin.
2020 jyldyń qyrkúıeginde Taýly Qarabaqta áskerı is-qımyl qaıta burq etti. Ol úsh aıǵa sozyldy. Bitimge kelýdiń úsh áreketi sátsiz aıaqtaldy, biraq 10 qyrkúıekke qaraǵan túni Baký men Erevan Máskeýdiń deldaldyǵymen beıbitshilik kelisimine qol qoıdy.