Qazaqstanda 230-dan astam sıngapýrlyq kompanıa men birlesken kásiporyndar tabysty jumys isteýde
Astanada QR Premer-Mınıstri Álıhan Smaıylov pen Sıngapýr Prezıdenti Halıma Iakobtyń qatysýymen Qazaqstan-Sıngapýr bıznes-forýmy ótti. Jıynda eki eldiń memlekettik organdary men isker toptarynyń 200-den astam ókili bas qosty, dep habarlaıdy Almaty-akshamy.kz.
Óz sózinde Álıhan Smaıylov ótken jyldary memleketter arasynda berik jáne úılesimdi qarym-qatynastar qalyptasqanyn atap ótti. Búginde Sıngapýr – Qazaqstannyń ASEAN aımaǵyndaǵy eń iri saýda jáne ınvestısıalyq seriktesi. Byltyrǵy jyldyń qorytyndysy boıynsha ekijaqty taýar aınalymy 65%-ǵa ósip, $2 mlrd-qa jýyqtady. Sondaı-aq osy kezeńde sıngapýrlyq ınvestısıa kólemi 6 ese ósip, $400 mln qurap, rekordtyq deńgeıge jetti.
«Búginde Qazaqstanda 230-dan astam sıngapýrlyq kompanıa men birlesken kásiporyndar tabysty jumys isteýde. Sonymen qatar ekonomıkalyq baılanystarymyzdy odan ári keńeıtip, tereńdetýge áleýetimiz jeterlik. Bizde serpindi ınvestısıalyq jobalardy júzege asyrýǵa qajetti barlyq alǵysharttar bar», — dedi Álıhan Smaıylov.
Ol Qazaqstanda iri sıngapýrlyq kompanıalardyń qatary belsendi túrde artyp kele jatqanyn atap ótti. Ásirese, Úkimet basshysy Almaty oblysynda keń aýqymdy G4 City jobasyn júzege asyryp jatqan Surbana Jurong-pen tabysty seriktestikti, álemge tanymal Indorama óndiristik tobymen ózara is-qımyldy, sondaı-aq QTJ men PSA International arasyndaǵy Orta dálizdi damytýdy jedeldetetin birlesken kásiporyn qurý boıynsha kelisimniń mańyzdylyǵyn atap ótti.
«Sıngapýrlyq bıznestiń Qazaqstanda birlesken jobalardy iske asyrýǵa qyzyǵýshylyǵy artyp kele jatqany bizdiń elimizdiń ınvestısıalyq ahýaldy jaqsartýǵa úlken kóńil bólip otyrǵanyn dáleldeı túsedi. Bul memlekettik qoldaý sharalary men túrli preferensıalar arqyly aıqyn kórinedi. Osylaısha, ekonomıkanyń basym sektorlaryna baǵyttalǵan arnaıy ekonomıkalyq jáne ındýstrıalyq aımaqtar jumys jasaıdy. Oǵan qatysýshylar barlyq qajetti ınfraqurylymǵa qol jetkize alady. Biz sıngapýrlyq áriptesterimizben yntymaqtastyǵymyzdy odan ári tereńdetýge daıynbyz», — dedi Premer-Mınıstr.
Óz tarapynan Prezıdent Halıma Iakob Qazaqstan Sıngapýrdyń Ortalyq Azıadaǵy eń iri seriktesi ekenin atap ótip, elder arasyndaǵy qarym-qatynastardyń odan ári nyǵaıa túsetinine senim bildirdi.
«Búgingi bıznes-forým Qazaqstanda jobalardy júzege asyrý múmkindikterin zerttegisi keletin kóptegen bıznes kóshbasshylaryn, onyń ishinde, sıngapýrlyq kompanıalardyń basyn qosty. Kúsheıip kele jatqan geosaıası syn-qaterlerdi eskere otyryp, bul eki eldiń ekonomıkasyn ártaraptandyrýǵa yqpal etedi. Osy turǵyda Sıngapýr seriktestikti keńeıtýge árdaıym ashyq. Ortalyq Azıanyń kindik ortasynda ornalasqan Qazaqstan óziniń orasan zor resýrstarymen ártúrli memleketter men kompanıalar úshin ınvestısıalyq tartymdy el bolyp tabylady», — dedi Prezıdent Halıma Iakob.
Forým qorytyndysy boıynsha saýda, ınvestısıa, logıstıka jáne memlekettik qyzmetkerlerdi oqytý salalaryndaǵy yntymaqtastyqty nyǵaıtýǵa baǵyttalǵan birqatar ekijaqty kelisimder men memorandýmdarǵa, sondaı-aq quny $275 mln bolatyn komersıalyq qujattarǵa qol qoıyldy.