Fransıa astanasy Parıj qalasynda ótip jatqan Olımpıada oıyndarynyń saltanatty jabylý rásiminde Qazaqstan týyn kimder alyp shyǵatyny belgili boldy.
Naqtyraq aıtsaq, oıyndardyń jabylý sharasynda el týyn erlerden taekvondoshy Batyrhan Tóleýǵalı men áıelder arasynda kórkem gımnastıkadan el namysyn qorǵaǵan Eljana Tanıeva alyp shyǵady, dep habarlaıdy aqshamnews.kz
Aıta ketsek, Batyrhan Tóleýǵalı Parıjde 80 kelige deıingi salmaqta synǵa tústi. Ol 1/8 aınalymda eki dúrkin álem chempıony, ıtalıalyq Sımone Alessıomen kezdesken bolatyn. Tartysty jekpe-jekte tájirıbeli ıtalıalyq sportshy 2:0 esebimen jeńiske jetti. Batyrhan Tóleýǵalı Qazaqstan sapynan Olımpıadaǵa qatysyp jatqan eń jas atlet. 18 jastaǵy sportshynyń bul tuńǵysh Olımpıadasy.
Al Eljana Tanıeva Parıj Olımpıadasynda tórt jattyǵýdyń qorytyndysy boıynsha fınalǵa óte almaǵan edi. Ol tórt jattyǵýdyń nátıjesi boıynsha 126.600 upaı jınady.
Esterińizge sala ketsek, Fransıa astanasy Parıj qalasynda ótken HHHİİİ jazǵy Olımpıada oıyndarynyń saltanatty ashylý rásiminde elimizdiń kók týyn bokstan Qazaqstan ulttyq quramasynyń kapıtany Aslanbek Shymbergenov pen jeńil atlet Olga Safronova ustap shyqqan bolatyn.