Qytaıda ótken oıyndar nátıjesi boıynsha sportshylar men jattyqtyrýshylarǵa 131 mln teńge berilgen.
Beıjińdegi Paralımpıada oıyndarynyń júldegeri Aleksandr Gerlıske Soltústik Qazaqstan oblysynan bir bólmeli páter beriledi, dep habarlaıdy Almaty-akshamy.kz QazAqparatqa silteme jasap.
Bul týraly QR Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Samat Erǵalıev ortalyq komýnıkasıalar qyzmetinde ótken brıfıńinde aıtty.
«2016 jylǵy Rıo Paralımpıadasynan bastap paralımpıada jáne sýrdolımpıada oıyndarynyń jeńimpazdary men júldegerleriniń qarjylaı syıaqylary ósip, olımpıadalyq sportshylarmen teńesti. Sonymen qatar, aldaǵy tańda sporttyq nátıjelerdi eskere otyryp ulttyq qurama jattyqtyrýshylary men sportshylarynyń jalaqylaryn kóterý máselesi qarastyrylady», - dedi komıtet basshysy.
Sondaı-aq, ol Beıjińdegi Paralımpıada oıyndarynda 10 shaqyrymdyq jarysta qola júlde alǵan bıatlonshy Aleksandr Gerlıske páter beriletinin aıtty.
«Beıjińdegi Paralımpıada oıyndarynyń nátıjeleri boıynsha sportshylar men jattyqtyrýshylarǵa Úkimet tarapynan jalpy somasy 131 mln teńge jáne «Dene shynyqtyrý men sport» týraly zań boıynsha Aleksandr Gerlıske Soltústik Qazaqstan oblysy ákimdiginiń tarapynan bir bólmeli páter beriledi», - dedi Samat Erǵalıev.