QR Densaýlyq saqtaý mınıstri Ajar Ǵınıat úsh jylda koronvırýspen kúreske qansha qarajat jumsalǵanyn aıtty, dep habarlaıdy Almaty-akshamy.kz
«2020 jyly pandemıamen kúreske búdjetten 252 mlrd teńge jumsaldy. Onyń 28 mlrd teńgesi dári-dármek, qorǵanysh quraldaryn, medısınalyq tehnıkalar satyp alýǵa ketti. 197 mlrd teńgesi dárigerlerdiń jalaqysyna ústemaqyǵa, túrli mamandardyń, ásirese, SES-te jumys isteıtin mamandardyń is-sapar shyǵyndaryna tólendi. 20 mlrd teńge halyqqa kórsetiletin medısınalyq kómek aqysyna Medısınalyq saqtandyrý qory arqyly shyǵyndaldy. Onyń ishinde 5 mlrd teńge Dúnıejúzilik bankke jasandy tynys alý apparattary úshin berildi», - dedi Ajar Ǵınıat Ortalyq komýnıkasıalar qyzmetinde ótken baspasóz máslıhatynda.
Mınıstrdiń aıtýynsha, 2021 jyly pandemıamen kúreske 556 mlrd teńge ketti.
«Óıtkeni, jyl boıy koronavırýs ınfeksıasymen kúrestik. Úsh tolqyny boldy. 97 mlrd teńge vaksına, shprıs alýǵa, ártúrli zerthanalyq zertteýlerge jumsaldy. 413 mlrd teńge medısına qyzmetkerlerine eńbekaqy, ústemeaqy tóleýge, is-sapar shyǵyndaryn óteýge ketti. 40 mlrd teńge emdeý qyzmetine qordan árbir aýrýhanaǵa tólendi. Bıyl 86 mlrd teńge qaralyp otyr. Onyń 9 mlrd-yna jyl basynda QazVac pen Vero Cell vaksınalaryn alǵan edik. 20 mlrd-y byltyr alǵan Pfizer aqshasyn tóledik», - dedi ol.