Ózbekstan soǵysqa qatysqan ardagerlerdiń sýretin alyp sherýge qatysýǵa qarsy
Ózbekstan Reseıdiń «Bessmertnyı polk» aksıasynan bas tartqaly jatyr, dep habarlaıdy Almaty-akshamy.kz Elorda.info-ǵa silteme jasap.
Bul týraly Ózbestannyń «Mıllıı tıklanısh» demokratıalyq partıasynyń jetekshisi Alısher Kadyrov málimdedi.
«Bul aksıa – Keńes Odaǵy saıasatyn nasıhattaýdyń quraly, kórshi eldiń «jumsaq kúshi». Biz mundaı sherýlerge qarsymyz», – dep jazdy Kadyrov óziniń Telegram-arnasynda.
Onyń aıtýynsha, adamzattyń fashızmdi jeńýine ózbek halqy da óz úlesin qosty.
«Ata-babalarymyzdyń bostandyq úshin kúreste jaýlap alýshylar men destrýktıvti nasıonalısterge qarsy qalaı soǵysqanyn eshqashan umytpaımyz. Alaıda Otan úshin qaza tapqan atalarymyzdyń fotosýretterin kóshege alyp shyǵyp, bázbireýlerdiń saıası quralyna aınaldyrǵymyz kelmeıdi. Onyń ornyna ardagerlerdiń rýhyna, árýaqtarǵa Quran baǵyshtaǵanymyz durys», – dedi ol.