Otbasy – adam úshin eń jaqyn áleýmettik orta, eń ystyq uıa.
Otbasy belgili dástúrlerdiń, jaǵymdy ónegelerdiń muralar men salt-dástúrlerdiń saqtaýshysy. Ata-ananyń, basqa da otbasy músheleriniń ómir súrý tájirıbesi árqaısysymyzǵa úlken mektep.
Qazaq halqynyń otbasy tárbıesindegi ózine tán jarasymdylyqtyń búginde quldyraýǵa ushyraýyna baılanysty qoǵamda birqatar keritartpa árekettiń paıda bola bastaǵanyn baıqaýǵa bolady. Ulttyq qundylyqtarymyzdy saqtap qalýdyń bir sheshimi – búgingi urpaqqa otbasynyń mańyzdylyǵyn jetkizý. Otbasy taqyryby Qazaqstan sýretshileri – Q.Teljanov, G.Ysmaıylova, K.Shaıahmetov, A.Stepanov, Á.Júsipov, S.Aıtbaev, O.Nurjumaev, D.Álıev jáne t.b. tulǵalardyń týyndylarynda kórkem kórinis tapqan. Olardyń shyǵarmalarynda otbasyndaǵy mahabbat pen tatýlyq, syılastyq pen qurmet-izet syndy qazaq dástúrinde atadan-balaǵa sińgen tárbıelik uǵymdar syr shertedi.
"Iá, otbasy – adam ómirindegi eń basty qundylyq. Ol ózara týystyq baılanystan bólek, mádenıetimizge, dástúrimizge, elimizge, jerimizge de paıdasyn tıgizetin keń aýqymdaǵy uǵym. Otbasy – árkimniń tynyshtyq mekeni. Ol – memleket ýyǵy. Ár shańyraqta bereke-birlik, tatýlyq bolsa, tutas el úshin de jaıly ómirge kepildik bar degen sóz", – deıdi Ábilhan Qasteev atyndaǵy QR Memlekettik óner mýzeıiniń «Qazaqstan beıneleý óneri» bóliminiń jetekshisi Gúlnur Jubanova.