Medeý aýdanyna qarasty №99 jalpy bilim beretin mektepte jýyrda 6-synyp oqýshylary ant berdi.
Bul oqý ornynda naýryz aıynan bastap «Jas saqshy» atty kadet synyby ashylyp, óz jumysyn bastady.
Mundaı erekshe synyptyń ashylýyna oqý orny men QR İİM Maqan Esbolatov atyndaǵy Almaty akademıasy arasynda jasalǵan memorandým negiz boldy. Jobany İİM akademıasynyń bastyǵy, polısıa polkovnıgi Qalıjan Qoblandın jeke ózi qoldady. Kóktemniń basynda polkovnıktiń shaqyrýymen oqýshylar akademıaǵa baryp, ekskýrsıaǵa qatysty. Bul qyzyqty sapar oqýshylarǵa úlken áser etip, olardyń kadet bolýǵa degen nıetin oıatty.
«Tigilgen ádemi forma, jańa kýálikter men sappen júrý daǵdylary – bári de oqýshylarymyzdyń armandaryn shyndyqqa aınaldyrdy. Olarǵa qarap kóz toımaıdy. Olar tek syrt kelbetimen ǵana emes, minez-qulqymen de ózgerdi. Kadetterdi eń aldymen tártip erekshelendiredi. Olar basqa oqýshylar úshin keremet úlgi. Óıtkeni kadet tárbıesi – bul jaı ǵana sabaqtar men keste emes, bul – ar-ojdany men patrıotızmi ómirlik qaǵıdaǵa aınalǵan, myqty, adal jáne maqsatker azamattardy tárbıeleý!», – dep maqtanyshpen atap ótti №99 mektep dırektory Sanıa Embergenova.
22 naýryzda «Jas Saqshy» kadetteriniń ant qabyldaýyna arnalǵan saltanatty rásimde konserttik baǵdarlama ótti. Kórermenderge óz ónerlerin mekteptiń hor qyzdary pash etti, bul hor da ótken oqý jylynda qurylǵan bolatyn. Qazaqstan týraly ándi 3-synyp oqýshysy Aısýltan Kenjetaı tamasha oryndap shyqty.
«Sizder tártipti, dástúrge qurmetti, bilimge umtylys pen ózin-ózi jetildirýdi talap etetin jolǵa qadam basyp otyrsyzdar, – dedi Medeý aýdandyq bilim bóliminiń basshysy Aqnur Nuralıeva jas saqshylarǵa. – Bul synypqa maqsatker ári rýhy myqty uldar men qyzdar irikteledi. Kadet bolý – jaı ǵana forma kıý emes, bul – ishki kúı. Bul – úlgi bola bilý, sheshimdi óz betinshe qabyldaý, álsizge kómektesý, ózińe, dosyńa jáne elińe jaýapkershilikpen qaraý».
Merekelik is-sharada akademıa kýrsanttary da óner kórsetti. Olar tek kadetterge ǵana emes, barlyq kórermenderge erekshe áser qaldyrdy. Al birinshi kýrs kýrsanty Ahat Samǵat «Qazaq polısıasy» atty patrıottyq ándi oryndap berdi.