Bıyl 20 tamyzda Almaty qalasy Ádilet departamentiniń Zıatkerlik menshik quqyqtary bólimi qyzmetkerleri «E» JSHS-ne qatysty bótenniń taýar belgisin zańsyz paıdalaný faktileri boıynsha jospardan tys tekseris júrgizdi. Tekseris júrgizýdiń negizi retinde otandyq belgili brendtiń quqyq ıelenýshisiniń resmı ótinishi alyndy.
İs-shara barysynda eleýli zańbuzýshylyqtar anyqtaldy: quqyq ıelenýshiniń tirkelgen taýar belgisin eliktetip, shatastyratyndaı dárejede uqsas belgilermen tańbalanǵan 18 myńnan astam ónim birliginiń bar ekendigi belgili boldy. Anyqtalǵandardyń ishinde daıyn ónimder, bos ydystar, qaqpaqtar men japsyrma rýlondary bar.
Bul iske erekshe mán beretin jaıt – tek saqtaý jáne satý maqsatyndaǵy ónim ǵana emes, sonymen qatar zańsyz óndiris faktisi de áshkerelendi. Arnaıy jabdyqta bótenniń taýar belgisin qoldanyp, qaptaý jáne tańbalaý jumystary júrgizilgeni anyqtaldy. Bul kontrafaktilik ónimdi óndirýdiń jolǵa qoıylǵan úderisi bar ekenin aıǵaqtaıdy.
Barlyq anyqtalǵan taýarlar tárkilendi, tıisti hattamalar jasaldy, al materıaldar Qazaqstan Respýblıkasynyń Ákimshilik quqyq buzýshylyq týraly kodeksiniń 158-baby aıasynda is boıynsha odan ári qaraý úshin sotqa joldandy.
Otandyq naryq úshin mańyzy
Zıatkerlik menshikti qorǵaý – bul tek zańdy saqtaý máselesi ǵana emes, ekonomıkalyq qaýipsizdiktiń strategıalyq faktory. Brendterdiń zańsyz paıdalanylýy otandyq kompanıalardyń bedeline nuqsan keltiredi, tutynýshylardyń senimin azaıtady jáne ulttyq bıznestiń básekege qabilettiligin álsiretedi.
Almaty qalasy Ádilet departamenti mundaı faktilerge júıeli túrde tosqaýyl qoıylatynyn málimdeıdi. Basty basymdyq – quqyq ıelenýshilerdiń quqyqtaryn qorǵaý, kásipkerler úshin ashyq ári adal jaǵdaıdy qamtamasyz etý, zıatkerlik menshikke qurmet mádenıetin qalyptastyrý bolyp qala beredi.
Ekonomıkalyq egemendik pen ulttyq maqtanysh
Otandyq brendterdi qorǵaý – bul tek quqyq qoldaný tájirıbesi ǵana emes, sondaı-aq Qazaqstan Respýblıkasynyń ekonomıkalyq egemendigin nyǵaıtý. Bul – elde eńbek, shyǵarmashylyq pen ınvestısıalardy qorǵaýǵa baǵyttalǵan jaǵdaı jasalyp otyrǵanynyń aıqyn dáleli.
Osylaısha, «E» JSHS isi Qazaqstannyń quqyqtyq tártipti nyǵaıtýǵa, adal básekelestikti damytýǵa jáne eldiń zamanaýı ári quqyqtyq memleket retinde, ulttyq jetistikterdi baǵalaıtyn ári qorǵaıtyn memleket retinde ımıjin qalyptastyrýdaǵy tabandylyǵyn kórsetetin mańyzdy kórsetkishke aınaldy.