Bul – Ulttyq kınony qoldaý ortalyǵynyń málimdemesi.
Búginde ár jyldary túsirilgen 29 tolyqmetrajdy fılm daıyn tur, dep habarlaıdy Almaty-akshamy.kz ortalyqtyń málimetine silteme jasap.
Olardyń ishinde Asqat Kýchınchırekovtyń "Baýyryna salý", Darhan Tólegenovtyń "Aǵaıyndy", Kenjebek Shaıqaqovtyń "Aıqaı", Serik Aprymovtyń "Aýyl" jáne taǵy basqa fılmder bar
Búginde ár jyldary túsirilgen 29 tolyqmetrajdy fılm daıyn tur. Olardyń jartysy endi ǵana aıaqtalyp jatsa, buǵan deıin túsirilgen keı týyndylar túrli sebepke baılanysty áli de prokatqa shyqpaǵan. Ekranǵa shyqpaǵan týyndylardyń qatarynda tipti 2019 jylǵy konkýrstyń nátıjesinde túsirilgen fılmder bar. Avtorlardyń kóbi festıválderge qatysamyn dep uzaq ýaqyt júrip qalǵanyn aıtyp otyr. Buǵan qosa tarıhı oqıǵalarǵa negizdelgen, uly tulǵalardyń mereıtoıyna arnalǵan jobalar da jeterlik.
Ortalyqtyń basqarma tóraǵasy Qurmanbek Jumaǵalıdiń aıtýynsha, keıbir kınogerler bastapqyda memleket qarajatyna fılm túsirý úshin óz jobasyn asyra maqtap, konkýrstan joldama alǵan. Biraq sońynda jobany odan ári ilgeriletý jumystarynan ózderi bas tartqan.
"Bul degenimiz, olardyń memlekettik qarjyǵa degen tek tutynýshylyq kózqarasyn kórsetedi. Eger fılmniń kórermenge jetýi avtorlardyń ózine qyzyq bolmasa, ony túsirip ne qajet? Mundaı kompanıalar men avtorlar boıynsha Ortalyq bolashaqta bir sheshim shyǵarady", - deıdi Jumaǵalı.
Al avtorlyq fılmderdiń orny bólek. Olar keminde bir jyl halyqaralyq festıválderdi aralap, ýaqytyn ótkizip alady. Ári mundaı týyndylardyń prokatqa shyǵýy da qıyn. Sebebi qarapaıym kórermender avtorlyq kınolarǵa kóp bara bermeıdi. Degenmen ony izdep júrip kóretin kınosúıer qaýym bar. Avtorlyq fılmderdiń ishinde Asqat Kýchınchırekovtyń "Baýyryna salý", Darhan Tólegenovtyń "Aǵaıyndy", Kenjebek Shaıqaqovtyń "Aıqaı", Serik Aprymovtyń "Aýyl" jáne taǵy basqa fılmder bar. Osy kartınalar da prokatqa kelesi jyly shyǵady.
Budan bólek, "Eva. Batyr qyz" sekildi derekti kartına sońǵy jartyjyldyqta 13 halyqaralyq kınofestıvalden júldeli oraldy. Baqyttas Sanıtastyń "Tezek" kartınasy boıynsha áıgili "Netflix" kompanıasymen kelsissóz júrgizilip jatyr. Ádilhan Erjanovtyń "Múıiztumsyq" atty kınosynyń álemdik premerasy kelesi jyly bedeldi Rotterdam kınofestıvalinde ótedi.