Tynyshtyq. Jaılylyq. Erekshe atmosfera. Kitap oqýǵa arnalǵan eń qolaıly jaǵdaı dál osyndaı. Úıde nemese kez kelgen ortada mundaı jaǵdaı jasaý múmkin shyǵar, biraq ol erekshe álemge jeteleıtin, sóreleri túrli kitaptarǵa toly kitaphanaǵa jetpeıdi.
Sýret: yandex.kz
Kitapsúıer izdenimpaz jandar úshin kitaphana - naǵyz rýhanı demalys orny. Munda bári tegin: bilim de, shabyt ta. Al osy álemge jan bitirip turǵan tulǵalar - kitaphanashylar. Bul taqyrypty qozǵaýymyz tegin emes. Sebebi búgin - Kitaphanashylar kúni. Osy kásibin ómirlik mısıasyna aınaldyrǵan jandardyń biri - Qýanysh Razaqqyzy Isabekova. Kitaphana salasynda 40 jyldan astam ýaqyt jemisti eńbek etip kele jatqan jandy Aqshamnews.kz tilshisi áńgimege tartyp kórdi.
Qýanysh Razaqqyzy eńbek jolyn 1988 jyly Mádenıet úıindegi aýyl kitaphanashysy bolyp bastaǵan. Keıin kitaphana meńgerýshisi qyzmetin atqaryp, 1992 jyly Almatyǵa qonys aýdarǵan soń, qalalyq ortalyqtandyrylǵan kitaphanalar júıesiniń №36 jasóspirimder kitaphanasynda eńbek etken. Segiz jyldan beri Almaty qalasyndaǵy №33 balalar kitaphanasyn meńgerýshisi qyzmetindegi ol buǵan deıin №29 balalar kitaphanasyn 10 jyl basqarǵan.
Óz isine adal mamannyń eńbegi de eskerýsiz emes, 2022 jyly ol "Mádenıet salasynyń úzdigi" atansa, ótken jyly "Qurmet" ordenimen marapattaldy.
Osy kúni Qýanysh hanym jetekshilik etip otyrǵan kitaphanaǵa kúndelikti 60-70 oqyrman keledi. Negizinen mektep oqýshylary men stýdentter jıi bas suǵady eken. Kitap qory jyl saıyn 1500-2000 jańa kitappen tolyqtyrylady, qazir mundaǵy kitap sany 19 myńǵa jýyqtap qalǵan.
Kitaphana oqyrmanǵa kitap taýyp berýmen ǵana shektelmeıdi. Munda balalarǵa arnalǵan túrli mádenı-tanymdyq sharalar, kitaphana saıahattary, ádebı kezdesýler turaqty túrde uıymdastyrylady.
"Balalardyń kitapqa degen qyzyǵýshylyǵyn arttyrý - bizdiń basty mindetimiz. Mekteptermen yntymaqtastyq ornatyp, oqýshylardy kitap álemimen tanystyramyz. Qazirgi balalardy zamanaýı avtorlar da qyzyqtyrady, sondyqtan suranysqa saı jańa kitaptardy izdep, elektron nusqalaryn da usynýǵa tyrysamyz", - deıdi Qýanysh Isabekova.
Kitaphanashy eńbegi - mádenı mısıa
Kópshilik kitaphanashy tek qajetti kitapty oqyrmanǵa taýyp berip, ony formýlárǵa jazyp, ýaqyty kelgende qaıtaryp alyp qana otyratyn adam dep oılaıdy. Biraq is júzinde bul - úlken mádenı-aǵartýshylyq jumys.
Qýanysh Isabekovanyń aıtýynsha, kitaphanashylar álemdik ondyq jikteý júıesi boıynsha kitaptardy rettep, eskirgen basylymdardy esepten shyǵarý, oqyrman suranysyn zertteý, elektron katalogtarmen jáne anyqtamalyq bazalarmen jumys isteý sıaqty kóp qyrly mindetterdi atqarady.
Bir kezderi mardymsyz jalaqyǵa da jumys istep kelgen kitaphanashylardyń eńbegi keıingi jyldary laıyqty baǵalana bastaǵany aıtylyp júr. Muny ózderi de rastap otyr:
"Jalaqymyz kóterilip, jaqsaryp keledi, memleket qoldaý kórsetip otyr. Jastardyń da kitaphana salasyna qyzyǵýshylyǵy artyp keledi. Jas býynnyń bul salaǵa bet burýy - qýantatyn jaǵdaı", - deıdi ol.
Qýanysh Razaqqyzy jetekshilik etip otyrǵan №33 kitaphana naǵyz rýhanı meken deýge bolar. Munda kitap ta, ınternet te tegin. Tek oqýǵa nıet bolsa, bolǵany.
Qýanysh Isabekova sıaqty jankeshti mamandardyń eńbegi arqasynda bul oryn tek kitap sóreleri emes, bilim men mádenıettiń, ult rýhanıatynyń júregine aınalyp otyr.
Qazir Almaty kitaphanalary jańa dáýirge birshama beıimdelgen. Elektron júıeler - "Library Almaty", "MegaPro" baǵdarlamalary arqyly jumys isteıdi.
Almaty Kitaphanalary baspasóz qyzmetiniń bergen aqparatyna saı, qalada 24 avtonom kitap berý apparaty ornatylǵan, olar aı saıyn 300 jańa oqyrmandy tirkeıdi jáne 420 kitapqa deıin beredi.
Almaty Kitaphanalary 28 zamanaýı kitaphana-bólimshesin biriktirip otyr, olardyń 97%-y jańǵyrtylǵan. Jalpy kitap qory 1,5 mıllıonnan asady. Al arnaıy qajettilikteri bar jandar úshin 7 bólimshede Braıl qarpimen jáne dybystyq ınterfeıspen jabdyqtalǵan bólimder jumys isteıdi.
Qozǵalysy shekteýli azamattarǵa arnalǵan úıge tegin kitap jetkizý qyzmeti de bar.
Almaty kitaphanalarynda osy kúni 471 maman eńbek etedi. Olardyń 30-dan astamy Germanıa, Shveısarıa, Fınlándıa, Koreıa, Estonıa, Shvesıa elderinde kásibı biliktiligin arttyrǵan.
Qýanysh Isabekova sıaqty tájirıbeli mamandardyń eńbegi arqasynda kitaphana jaı ǵana sóreler emes, rýhanıat pen mádenıettiń ordasyna aınalǵan. Tynyshtyq pen taýsylmas qazyna - bilim ordasynyń kórinbeıtin keıipkerleri - kitaphanashylar kúni qutty bolsyn!