Onyń sebebin Oqý-aǵartý mınıstri túsindirdi.
QR Oqý-aǵartý mınıstri Ǵanı Beısembaev bıylǵy oqý jylyn qorytyndylady, dep habarlaıdy Almaty-akshamy.kz.
«Oqý jylynyń aıaqtalýyna sanaýly kúnder qaldy. Mınıstrlik aldynda turǵan mańyzdy mindetterdiń biri – bıylǵy oqý jylyn tabysty aıaqtaý jáne balalardyń jazǵy demalysy men saýyqtyrýyn sapaly uıymdastyrý ári qaýipsizdigin tolyq qamtamasyz etý», - dedi mınıstr Úkimet otyrysynda.
Bıylǵy oqý baǵdaralamasyna engizilgen ózgeris – elimizde oqý jyly 34 aptadan 36 aptaǵa deıin uzartyldy. Sáıkesinshe, oqý jyly 31 mamyrda aıaqtalady.
«Bul sheshimniń basty sebepteri: balalardyń otbasynda kóbirek ýaqyt ótkizýine qatysty ata-ana ótinishteriniń eskerilýine baılanysty 5 kúndik oqý aptasyna kóshý; oqýshylarǵa júktemeni azaıtý jónindegi sarapshylar usynysy; oqý aptasynyń uzaqtyǵyn Ekonomıkalyq yntymaqtastyq jáne damý uıymynyń standarttaryna sáıkestendirý. Álemdik tájirıbege nazar aýdarsaq, EYDU elderinde oqý jyly 40 aptany quraıdy», - dep túsindirdi Ǵ.Beısembaev.
Onyń aıtýynsha, álem oqýshylary jazǵy kanıkýlda 77 kún ǵana demalsa, elimizdiń oqýshylary úshin 13 apta nemese 90 kún demalys belgilengen.