Japonıada qaraýsyz qalǵan úıler sany 9 mıllıonǵa jetti.
Bul jaıynda aqshamnews.kz islam.kz portalyna silteme jasaı otyryp.
Bul rette 65 jáne odan joǵary jastaǵy adamdar úlesi ótken jyldyń jeltoqsan aıyndaǵy derek boıynsha óz halqynyń 20%-nan asqan, dáliregi, 10 244 550 adamǵa jetken.
Birikken Ulttar Uıymy 65 jáne odan joǵary jastaǵy adamdar úlesi halyqtyń 7%-dan astamyn quraıtyn qoǵamdy «qartaıǵan qoǵam» jáne osy jas tobyndaǵylar qarasy 14%-dan astamyn quraıtyn qoǵamdy «eski qoǵam» sanatyna jatqyzady. Al bul kórsetkish halyqtyń jalpy sanyna shaqqanda 20%-dan assa, «shekten tys qart» qoǵam sanatyna enedi.
ChosunBiz baıandamasynda Tańǵy shyq elinen 19 jyl buryn «shekten tys qart qoǵamyna» aınalǵan, ıaǵnı, 2004 jyldan bastap atalmysh sanatqa engen Japonıa aýmaǵyndaǵy turǵyn úılerdiń 13,8%-y búgingi tańda ıesiz qańyrap tur. Kúnshyǵys eli úkimettiń málimetinshe, 2023 jyldyń qazan aıyndaǵy maǵlumat boıynsha Japonıadaǵy qaraýsyz qalǵan úılerdiń sany rekordtyq deńgeıge - 9 mıllıonǵa jetti. Bul kórsetkish 2018 jylmen salystyrǵanda 510 000-ǵa kóp. Naryqty taldaý nátıjesi kórsetkendeı, bos turǵan úılerdiń naqty sany odan da kóp. Nomura zertteý ınstıtýtynyń esebine qaraǵanda, Japonıada shamamen 11 mıllıon úı bos tur jáne 2033 jylǵa qaraı bos turǵan úıler barlyq jyljymaıtyn múliktiń 30% -nan astamyn quraıtyn bolady. Japondar uǵymynda «akıa» degen atpen tanylǵan mundaı úıler shapshań qartaıý jáne týý kórsetkishiniń tómen bolýynyń naqty belgisi retinde jikteledi.
Japonıanyń ishki ister jáne komýnıkasıa mınıstrliginiń deregi boıynsha 2023 jylǵy qazandaǵy málimet boıynsha sheteldik turǵyndardy qosa alǵanda Japonıa halqynyń sany 124,352 mıllıon adamdy qurady. Japon halqy, mine, qatarynan 12 jyl kemip keledi. Bul merzimde jasy 75-ke jetken jáne odna joǵary qarttar qarasy 713 000 adamǵa artyp, alǵash ret 20 mln-nan asty. Osyǵan qaramastan jasy 65-tegi jáne odan joǵary qarttarqarasy 900 myń adamǵa kemigenimen qarttar sany halyqtyń jalpy sanyna shaqqanda báribir joǵary kúıinde qalyp otyr - 29,1%. Qańyraǵan úılerdiń 72% -dan astamy qandaı da bir kezeńde jalǵa bermeıtin, satpaıtyn qaraýsyz qalǵan úıler esebinen qalyptasty. Mundaı ǵımarattar sany 3,9 mıllıon bolyp shyqty, barlyq bos turǵan úılerdiń jartysyna jýyǵy nemese 42,8% -y. Bul rette mundaı úıler 2003 jyly 32,1% -dy quraǵan bolatyn. Qartaıǵan qoǵamǵa tán mundaı qorqynyshty qubylys bala-shaǵasynan nemese basqa týystarynan alys turatyn ata-analardyń qarttar úıine kóshýine nemese ómirden ketýine baılanysty qalyptasqan. Balalarynyń nemese týystarynyń mundaı qańyraǵan múlikti ıelený qıyn, olar ony jalǵa da bere almaıdy, sata da almaıdy jáne joǵary salyq tólemeý úshin muraǵa alýdan bas tartqandy jón kóredi. The Guardian merzimdi basylymy atap ótkendeı, Japonıanyń bos turǵan úıleri Avstralıanyń barlyq halqyn panalatýǵa, ıaǵnı, bir úıge úsh adamnan ornalastyrýǵa jetkilikti. Asian investor portaly 2024 jyldyń birinshi toqsanynda Japonıanyń jyljymaıtyn múlikke tartylǵan ınvestısıasy 31,3 mlrd dollarǵa deıin tómendegenin habarlady, bul kórsetkish sońǵy 10 jyldaǵy eń tómengisi.