Almatyda týberkýlezge qarsy kúres qarqyndy jalǵasýda, bul iske úkimettik emes uı̆ymdar (ÚEU) aı̆tarlyqtaı̆ úles qosýda. «Meı̆irimdi jol» qoǵamdyq qory birneshe jyldan beri týberkýlezben aýyratyn naýqastarǵa jan-jaqty qoldaý kórsetip, tek emdeýge ǵana emes, áleýmettik máselelerdi sheshýge de kómektesýde. Bul týraly óńirlik komýnıkasıalar qyzmetinde ótken baspasóz konferensıasynda qordyń joba jetekshisi Madıar Abdılov málimdedi, dep habarlaıdy aqshamnews.kz
«Ótken jyly biz negizgi halyq toptarynan 530 adamdy tekseristen ótkizip, olardyń 87-sinen týberkýlez anyqtadyq. Aýrýdy erte anyqtaý ǵana emes, ony ýaqytyly emdeý de asa mańyzdy. 2024 jyly biz buryn emin toqtatqan 22 naýqasqa qaı̆tadan medısınalyq kómek berdik», – dep málimdedi spıker.
Onyń aı̆týynsha, qordyń basty baǵyttarynyń biri – naýqastardy áleýmettik qoldaý. 2024 jyly 66 turǵylyqty jeri joq adam emhanaǵa tirkelse, 152 pasıent resmı tirkeýge qoı̆yldy, al týberkýlezden zardap shekken 82 otbasy daǵdarys ortalyqtaryna jiberildi.
Sonymen qatar, jumysqa ornalastyrý men áleýmettik qoldaý alýǵa kómektesý sharalary da uı̆ymdastyryldy. Nátıjesinde 72 pasıent Jumyspen qamtý ortalyǵyna kezekke qoı̆ylyp, ambýlatorlyq em qabyldap júrgen 128 naýqas azyq-túlik sebetterin aldy, al 160 adamǵa kólik kartalary berildi. Budan bólek, bilim berý trenıńteri, zańgerlik keńester men mádenı-demalys sharalary uı̆ymdastyryldy.
«Týberkýlezge qarsy keshendi sharalar, onyń ishinde medısınalyq, áleýmettik jáne psıhologıalyq qoldaý naqty nátıjeler berýde. Bul proseste ÚEU-lar mańyzdy ról atqarady, olar naýqastarǵa tek aýrýdy jeńýdi ǵana emes, sonymen qatar ómirlik qıyndyqtardy eńserýge kómektesedi», – dep túı̆indedi Madıar Abdılov.
Spıkerdiń aı̆týynsha, memleket pen qoǵamdyq uı̆ymdardyń birlesken jumysynyń arqasynda Almatyda týberkýlezdiń aldyn alý, erte dıagnostıka jasaý jáne ony tıimdi emdeý úshin barlyq qolaı̆ly jaǵdaı̆lar jasalýda