Onkogınekologıalyq aýrýlar búkil álem boıynsha áıelder óliminiń negizgi sebepteriniń biri bolyp qala beredi.
Bul aýrýlardyń eń basty qaýpi - bastapqy kezeńderde aýrýdyń eshbir belgilersiz ótýi. Áıel ózin jaqsy sezinedi, ádettegi ómir saltyn ustanady jáne aǵzasynda eleýli ózgerister bolyp jatqanyn tipti sezbeıdi de.
Almaty onkologıalyq ortalyǵynyń onkogınekologıa bóliminiń meńgerýshisi, PhD doktory Raıhan Bolatbekova atap ótkendeı: gınekologqa únemi baryp turý - tıimdi profılaktıkanyń negizi. Qarapaıym tekserýler - dárigerdiń qaraýy, onkosıtologıaǵa jaǵyndy taldaý nemese jambas músheleriniń últradybystyq zertteýi - isik aldy ózgeristerdi nemese isikti erte kezeńde anyqtaýǵa múmkindik beredi, al bul kezde emdeý eń tıimdi bolady.
«Aýrýdyń erte kezeńinde dárigerge júginý - densaýlyqty ǵana emes, ómirdi de saqtap qalýǵa múmkindik beredi. Aýrý neǵurlym erte anyqtalsa, sátti emdelý yqtımaldyǵy soǵurlym joǵary», - deıdi Raıhan Bolatbekova.
Onyń aıtýynsha, 40 jastan asqan áıelder men qaýip faktorlary bar (tuqym qýalaıtyn beıimdilik, sozylmaly qabyný aýrýlary nemese jynystyq ómirdiń turaqsyzdyǵy) áıelder óz densaýlyǵyna erekshe nazar aýdarýy qajet. Mundaı naýqastar úshin profılaktıkalyq tekserýler turaqty túrde júrgizilýi tıis.
Raıhan Bolatbekova 30 ben 70 jas aralyǵyndaǵy, onkopatologıa boıynsha dınamıkalyq baqylaýda turmaıtyn áıelderge skrınıng júrgiziletinin eske salady. Tekserýden ótý úshin tirkelgen emhanaǵa júginý jetkilikti - ondaǵy skrınıng kabınetteri qyzmet kórsetedi. Ózimen birge jeke kýálik bolýy qajet.
Mysaly, bıylǵy jyldyń alǵashqy jartyjyldyǵynda Almaty qalasynda jatyr moıny obyryna baılanysty 46 myńnan astam áıel tekserýden ótken. 20 naýqasta jatyr moıny isigi alǵash ret anyqtalǵan, onyń 80%-y I satyda - bul kezde emdeý nátıjesi asa tıimdi bolady. Sonymen qatar, qaterli isikke deıingi jaǵdaılardyń 411 jaǵdaıy anyqtaldy.
«Profılaktıkalyq tekserýler - árbir áıeldiń ádetine aınalýy tıis. Sebebi bul - tek densaýlyqqa degen qamqorlyq qana emes, ómirdi saqtap qalýdyń da múmkindigi», - dep qorytyndylady maman.