Mınıstrlik kadr tapshylyǵy máselesin júıeli túrde sheshýge kiristi
Bilim jáne ǵylym mınıstri Asqat Aımaǵambetov muǵalim tapshy óńirlerge barǵan ustazdardyń jalaqysy eki ese joǵary bolatynyn aıtty. Mınıstrdiń aıtýynsha, qazir Atyraý, Mańǵystaý, Túrkistan jáne Almaty oblystarynda muǵalim tapshylyǵy qatty seziledi. Kadr jetispeýshiligin sheshý úshin mınıstrlik arnaıy baǵdarlama qabyldanyp, oǵan tıisti qarjy bólinip jatyr, dep habarlaıdy Almaty-akshamy.kz Elorda.info-ǵa silteme jasap.
«Birinshiden, muǵalim tapshylyǵy bar óńirlerge barǵan áriptesterimizdiń jalaqysy eki ese kóp bolady. Biraq olarǵa KRİ retinde kórsetkishter qoıylady. Ekinshiden, olarǵa jumys istegen ýaqytta baspana beriledi, úıdiń komýnaldyq shyǵyndaryn memleket óteıdi. Osylaısha eń úlken tapshylyq bar óńirlerdegi máseleni sheship jatyrmyz», - dedi Asqat Aımaǵambetov Májilis kýlýarynda.
Onyń aıtýynsha, qarajat respýblkalyq transfertter esebinen baǵyttalady.
«Iaǵnı, bul – maqsatty transfertter. Aqsha jergilikti búdjetke jiberiledi. Keıin ol arnaıy konkýrstan ótip, óńirge sabaq berýge kelgen muǵalimderge tólenedi», - dedi mınıstr.
Sondaı-aq ol muǵalimder tapshylyǵy oqýshylar sanynyń ósýinen bolyp otyrǵanyn aıtty.
«On jyl ishinde mektepte oqıtyn balalar sany bir mıllıonǵa jýyq artty. Ol degenimiz muǵalimder sany da ósip jatyr degendi bildiredi. Endi 2025 jylǵa deıin bizge taǵy 100 myń muǵalim qajet bolady. Bizge jańa mektepter qajet, al jańa mektepterge jańa muǵalimder kerek. Bir mektep ashylǵanda ortasha eseppen 150-200 muǵalim qajet bolady. Soǵan baılanysty osyndaı másele týyndap jatyr», – dedi mınıstr.
Onyń málimdeýinshe, kadr tapshylyǵy máselesi buǵan deıin de bolǵan. Qazir mınıstrlik problemany júıeli túrde sheshýge kirisken.