Úkimette vıse-premer Serik Jumanǵarınniń tóraǵalyǵymen ótken keńeste jem-shóp daıyndaý naýqanynyń qorytyndysy aıtyldy.
Óńirlerde barlyǵy 24,7 mln tonna jem-shóp daıyndaldy. Bul maldy qystan shyǵarýǵa qajetti mal azyǵy kóleminiń 98,9%-yn quraıdy. Jem-shóp qorynyń quramyna 1,5 mln tonna shóp, 1,9 mln tonna súrlem, 4,5 mln tonna saban, 4,9 mln tonna qunarly jem kiredi. Bıylǵy aýa raıynyń qolaısyzdyǵyna qaramastan mundaı nátıjelerge jedel shtabtyń ýaqtyly áreket etýiniń jáne memlekettik qoldaý sharalarynyń arqasynda qol jetkizildi, dep habarlaıdy Almaty-akshamy.kz.
«Azyq-túlik korporasıasy” AQ jelisi boıynsha fermerlerge arzandatylǵan baǵamen astyq satýǵa arnalǵan 235 myń tonna kóleminde jem-shóp qory qalyptastyryldy. Jemshóp daıyndaý úshin qosymsha 58 myń tonna jeńildetilgen dızel otyny bólindi. "QazAgroQarjy" AQ jem-shóp daıyndaý tehnıkasynyń jeńildikti lızıńin qarjylandyrý úshin 10 jylǵa 6%-ben 20 mlrd teńge bóldi. Bul baǵdarlama boıynsha 6,9 mlrd teńge ıgerildi, bul 35%-dy quraıdy», — dedi aýyl sharýashylyǵy vıse-mınıstri Amangalıı Berdalın.
«Báıterek» UBH» AQ jelisi arqyly aýyl sharýashylyǵy taýaryn óndirýshiler nesıeleriniń merzimin uzartý jáne qaıta qurylymdaý jumystary júrgizilip keledi. Qazirdiń ózinde 23,5 mlrd teńgege 574 ótinim maquldandy, 16 mlrd teńgeniń 224 ótinimi qaralýda. Sonymen qatar Mańǵystaý oblysynyń malshylary úshin temirjol kóligimen mal azyǵyn tasymaldaý tarıfteri 80%-ǵa tómendetildi.
«13 óńirde mal azyǵyn sýbsıdıalaý úshin taýar óndirýshilerge barlyǵy 27,6 mlrd teńge baǵyttaldy, onyń ishinde jedel shtabtyń usynysy boıynsha 12,9 mlrd teńge qosymsha bólindi», — dep atap ótti A.Berdalın.
Osylaısha, qabyldanǵan sharalar qysqa qajetti mal azyǵy qorlaryn qalyptastyrýǵa múmkindik berdi. SQO, Qaraǵandy, Mańǵystaý, Pavlodar oblystarynda pishen men qunarly jemniń jetispeýshiligi baıqalady. Jıyn qorytyndysy boıynsha Serik Jumanǵarın barlyq óńirlerde qajetti mal azyǵy kólemin daıyndaýdy qamtamasyz etýdi jáne olardy mal qystaıtyn oryndarǵa jetkizýdi erekshe baqylaýǵa alýdy tapsyrdy.