Jarysta 28 óner adamy boz kilemge shyqty
Qazaq kúresin damytýǵa baǵyttalǵan shara Táýelsizdiktiń 30 jyldyǵyna arnaıy uıymdastyrylǵan, dep habarlaıdy Almaty-akshamy.kz.
Oǵan elimizge tanymal óner adamdary men ǵalamtor juldyzdary qatysty. Mega jobany «Habar» Agenttigi bıyl da qalyń kórermenge usynyp, tikeleı efırde kórsetti.
«Óner barysy» 2019 jyldan beri osymen 3-shi márte ótip otyr. Mega joba az ýaqyt ishinde kórermenniń zor yqylasyna bólenip, tipti QR «Qazaq kúresi» federasıasynyń kúntizbesine engizilgen. Bıylǵy shara Taraz qalasyndaǵy Jaqsylyq Úshkempirov atyndaǵy sport saraıynda uıymdastyryldy.
Jarysta 28 óner adamy boz kilemge shyǵyp, ózara myqtyny anyqtady. Olardyń arasynda aıtysker aqyn, belgili ázilkeshter, ánshiler men ózge de tanymal tulǵalar bar. Bıylǵy erejege sáıkes qatysýshylar 4 salmaq, ıaǵnı jeńil, orta, aýyr jáne asa aýyr salmaq boıynsha baq synap, federasıanyń kásibı tóreshileri tórelik etti. Bes saǵatqa sozylǵan jarysta jeńil salmaqta akter Asylhan Tólepov jeńimpaz atandy.
«Búgin úsh dúrkin chempıon atanyp, jeńiske jetip jatyrmyz. Shúkir. Bul – ustazdarymnyń arqasy, sol kisilerdiń eńbegi. Ózim de osy jarysqa bir aıdaı ýaqyt jumsap, júıe boıynsha daıyndaldym. Bul jeńisimdi Táýelsizdigimizdiń 30 jyldyǵyna arnaımyn», -dedi «Óner barysynyń» jeńimpazy Asylhan Tólepov.
Juldyzdar aıqasyn tamashalýǵa kelgen halyq sanynda esep joq. Sport kesheni lyq toldy. «Óner barysy» jobasyn «Habar» Agenttigi telekórermen nazaryna usynyp, jarysty tikeleı efırde kórsetti.
«Habar» Agenttigi osymen qatarynan úshinshi jyl «Óner barysy» ulttyq jobasyn qoldap kele jatyr. Nege «ulttyq» degen sózge basymdyq berip turmyn. Óıtkeni bul jobanyń maqsaty tek óner, mádenıet, medıa, ǵalamtor juldyzdaryn ǵana jarystyryp, sharshy alańǵa shyǵarý emes. Sondaı-aq osy joba arqyly bizdiń rýhanıatymyzda, dástúrimizde úlken orny bar qazaq kúresin keńinen nasıhattaý», -dedi «Habar» Agenttigi» AQ basqarma tóraǵasynyń birinshi orynbasary Rınat Kertaev.
Sondaı-aq joba uıymdastyrýshysy Meıirjan Álibek pikir bildirdi.
«Joba «tanymal emes» adamdy tanytýmen aınalyspaıdy. Bizdiń joba tanymal adam arqyly qazaq kúresin damytady. Bıylǵy ereksheligi – sanynda. Iaǵnı biz 20 qatysýshydan asyrmaýshy edik. Bul joly 28 qatysýshyny shaqyrdyq. Onyń ishinde 50% – buryn qatyspaǵan jańa qatysýshylar. Táýelsizdik kúni merekesine oraılastyrylǵan «Óner barysy» joǵary deńgeıde ótti. Júlde qory 16 mıllıon teńge. Óz salmaǵynda jeńimpaz bolǵan chempıondardyń árqasysy 1 mln 200 myń teńgeden ıelendi. Sharaǵa qatysyp, jeńilip qalǵan qatysýshylar da qur alaqan qaıtqan joq. Olarǵa 250 myń teńgeniń sertıfıkaty tabys etildi», -dedi ol.