Almatyda QR Eńbek sińirgen jattyqtyrýshy, sport sheberi İzbazar Orazbaqulynyń eske alýǵa arnalǵan asyq atýdan dúbirli týrnır uıymdastyryldy. İzbasar Orazbaquly kezinde ulttyq sportymyzdyń ishindegi asyq atý ónerine mán berip, túrli jarystardy uıymdastyrýǵ at salysqan.
«Ardaqty aǵamyz zeınetke shyqqansha qatarynan 20 jyldaı qalamyzda jarys ótkizip keldi. Ol kisiniń «Baspaldaq»- atty jarysyna talaı ret baryp, kýási bolǵan edim. Sonda Almaty qalasynyń eńbektegen balasynan eńkeıgen qartyna deıin baryp jarysta baqtaryn synap jatatyn. Ol kisiniń densaýlyqty jaqsartý jaǵyndaǵy eńbegi de eren dep aıtqan durys bolar. Halyqtyń densaýlyǵynyń jaqsara túsýine ózi muryndyq bolǵan sport sharalary arqyly eńbeginiń jemisin kórgen ardaqty aǵamyz QR Eńbegi sińigen qaıratkeri boldy. «Bir adam qazǵan qudyqtan myń adam sý ishedi» degen eken babalarymyz. Densaýlyqty jaqsartýdyń joly sport arqyly degen uǵymdy arqaý etip, izgiliktiń dánin ege bilgen İzbazar Orazbaqulynyń júrip ótken ómir joly jastarǵa tunyp turǵan úlgi ónege edi. İzbasar aǵamyzdyń baqılyq dúnıege sapar shekkenine de, mine, jyldan asyp barady. Jaqsynyń ózi ólgenmen, artyna qaldyrǵan izgilik jolyndaǵy izi ólmek emes», – dedi Aqyn Ordabaıuly.
Týrnırge qatysýshylar ulttyq sportymyzdyń asyq atý men bes asyq óneri boıynsha synǵa tústi. Aıtýly jarysqa qaladaǵy 5 aýdannan 64 sportshy qatysty. Olardyń ishinde 32 ul asyq atýdan baǵyn synasa, bes asyqtan 32 arý baqtaryn syndy. Qala mektepterinde dene shynyqtyrý pániniń ustazdary kelip sheberligin synaǵyn alaman týrnır óte tartysty ári qyzyqty ótti.
İzbazar Orazbaquly1990 jyly Marokkonyń Mehnas qalasynda ótken jeńil atletıkadan ardagerler arasyndaǵy birinshilikte álem chempıony atanady. Sol bir dúbirli ótken baıraqty jarysta 100 metrlik júgirýde aldyna jan salmaǵan jelaıaq, ıadro laqtyrýdan da qarsylastaryn artta qaldyryp ketken eken. Kóp jyldar boıy Almatydaǵy halyqtyq, ulttyq sport túrleri jáne buqaralyq saýyqtyrý-dene shynyqtyrý klýbynda eńbek etti.
«İzbasar Orazbaquly - Almaty shaharynda buqaralyq sport pen salaýatty ómir saltyn qalyptastyrýda orasan úlesin qosqan jan. Sondaı-aq, saýyqtyrý-shynyqtyrý arqyly densaýlyqty jaqsartý jattyǵýlarynyń kindik atasy ári negizin qalaýshy. Bul sharaǵa uıytqy bolyp bastóreshilik jasaǵan Asan Qanapıanov - kezinde İzbasar aǵamyzdyń qasynda júrip sharapatyna bólengen ulttyq sporttyń janashyry. Ulttyq altyn qunydylyǵymyzdyń biri - asyq atýdyń bylaısha aıtqanda maıyn ishken, bilgir azamat jarystyń sondaı ádiletti ári janjalsyz ótýine zor septigin tıgizdi», – dedi Aqyn Ordabaıuly.
Asyq atýda úlken ónerdi talap etetin ulttyq sport túri bolyp tabylady. Qulja saqany qolyna ustap, 5-6 metrdeı jerdegi jerge tizilgen asyqtarǵa dál tıgizý ekiniń biriniń qolynan kele bermes óner. Óıtkeni, eptiligi men dáldiligi kelgen asyqshy ǵana kózdegendi dál atyp alańnan shyǵary alady. Hosh, sonymen altyn asyqtaryn shıire tartqan ustazdardyń arasynan 1-oryndy Jetisý aýdanynyń asyqshylary jeńip aldy. Jetisý komandasy jeńimazdarynyń arasynda Erlanuly Jalǵas, Turǵanbekov Nurkeldi jáne Qantóreev Erlandardyń erekshe jetistikterin aıtpaı ketýge bolmas. Al, 2-oryndy Áýezov, 3-oryndy Almaly aýdandarynyń asyqshylar komandalary jeńip aldy. Al, bes asyq óneri boıynsha 1-oryndy Áýezov aýdany jeńip aldy. Osy bes asyq saıysynda Seıdehmatova Shynar, Amanova Gúzaram men Jaqslyqova Dınaralar erekshe ónerlerimen kózgi túsip, úzdik shyqty. Al, 2-oryndy Jetisý komandasy ılense, júldeli 3-orynmen Naýryzbaı aýdanynyń asyqshylary marapattaldy.