COVID-19 táýliktik syrqattanýdyń 60 paıyzdan astamy úsh aımaqta tirkeldi. Bul týraly búgin Úkimet otyrysynda QR Densaýlyq saqtaý mınıstri Ajar Ǵınıat aıtty, dep habarlaıdy almaty-akshamy.kz QazAqparatqa silteme jasap.
«Elimizde COVID-19-ben táýliktik syrqattaný kórsetkishiniń 60 paıyzdan astamy úsh aımaqta tirkeldi. Nur-Sultan qalasynda aýrý 32 ese ósip, bul rette testileý deńgeıi el boıynsha eń joǵary jáne táýligine 10 myńnan astam testi qurap otyr. Biraq, bas qalada halyqty vaksınalaý qarqyny 1,5 ese jáne revaksınasıa qarqyny 4 ese tómen», - dedi Ajar Ǵınıat.
Onyń aıtýynsha, Almaty qalasynda SARS-CoV2 aýrýy 8 ese ósti.
Testileý deńgeıi qalpyna keltirilip, osy jylǵy qańtardan bastap 3,5 ese artty. Degenmen, vaksınasıa qarqyny 1,6 ese jáne revaksınasıa qarqyny 3 ese tómendep otyrdy.
«Qaraǵandy oblysynda syrqattaný 9 ese ósti, al vaksınasıa qarqyny 3 jáne revaksınasıa qarqyny 3,5 ese tómendedi. Ótken aptanyń sońynda Nur-Sultan qalasy men Qaraǵandy oblysynyń jergilikti atqarýshy organdary basshylyǵynyń qatysýymen aýrý ósimine daıyndyqty baǵalaý jáne qabyldanatyn sharalar boıynsha respýblıkalyq shtab ótkizilip, usynym berildi. Árbir óńirmen jumys jalǵasady», - dedi mınıstr.