Premer-mınıstr Oljas Bektenov elektr mopedteri men samokattardy qoldanýǵa qatysty baqylaýdy kúsheıtýdiń mańyzdylyǵyna toqtaldy.
Onyń aıtýynsha, bul kólik túrleri qoǵamdyq kólikterge túsetin júktemeni belgili bir deńgeıde azaıtqanymen, jol erejelerin saqtamaý saldarynan turǵyndarǵa qolaısyzdyq týǵyzyp, qozǵalys qaýipsizdigine qater tóndirip otyr.
- Jyl basynan beri elektrosamokattardyń qatysýymen 360-tan astam jol-kólik oqıǵasy tirkelgen.
- Memleket basshysy Joldaýynda osy ózekti máselege erekshe nazar aýdarǵan bolatyn.
- Álemdik tájirıbe kórsetkendeı, birqatar elderde mundaı kólikterge tolyq tyıym salý nemese qatań shekteýler engizý sharalary qabyldanǵan.
Máselen, Parıjde 2023 jyldyń qyrkúıeginen bastap samokattardy jalǵa alý toqtatylyp, tek jeke menshik kólikti paıdalanýǵa ruqsat etilgen. Madrıdte de ótken jyldyń qazanynan osyndaı sheshim qabyldandy. Al Ulybrıtanıada árbir elektrosamokatqa memlekettik nómir berilip, ony tek júrgizýshi kýáligi bar azamattar ǵana basqara alady.
«İshki ister mınıstrligi zańnamaǵa tıisti túzetýlerdi jedel engizýi tıis. Búgin biz osy másele boıynsha Úkimettiń qorytyndysyn qabyldaımyz», — dedi Oljas Bektenov.
Sonymen birge, ol adam ómiri men densaýlyǵyn qorǵaý kúre joldardaǵy qaýipsizdikti qamtamasyz etýdiń basty baǵyty bolyp qala beretinin atap ótti.