QR Premer-mınıstri Oljas Bektenov Úkimet otyrysynda 2025 jylǵy kóktemgi dala jumystary úshin sharýalarǵa qarjy bólý máselesin kóterdi. Qarjylandyrý ótken jyly bastalǵany atap ótildi, dep habarlaıdy aqshamnews.kz.
Aýyl sharýashylyǵy mınıstri Aıdarbek Saparov osy baǵytta atqarylyp jatqan jumystar týraly baıandady.
«Biz qarjylandyrýdy ótken jyldyń 29 qarashasynda bastadyq. Atalǵan jumysqa jalpy 100 mlrd teńge bólinip, qazirdiń ózinde onyń 70 mlrd teńgesi sharýalarǵa berilgen. Ári qaraı jumys júrgizilip jatyr. Oblystarda ÁKK áli qosylmaǵan, olardy ÁKK arqyly da taratý kerek, sonda jumys tezirek júredi. Jalpy qarjy bar», — dedi Aıdarbek Saparov.
Premer-mınıstr jumysty jedeldetýdi tapsyrdy.
Aıta ketý kerek, Prezıdent tapsyrmasyn oryndaý aıasynda 2025 jylǵy kóktemgi egin jáne kúzgi jıyn-terim jumystaryna «Keń dala-2» baǵdarlamasy boıynsha jalpy 700 mlrd teńgege deıin, onyń ishinde 140 mlrd teńgesi – búdjet qarajaty, 560 mlrd teńgesi – naryq qarajaty jumsalady. Sharýalarǵa óteý merzimi 2026 jylǵy 1 naýryzǵa deıin belgilengen jyldyq 5%-ben nesıe beriledi.
Erte qarjylandyrý dıhandarǵa egis naýqanyn ýaqtyly bastaý úshin barlyq qajetti qural-jabdyqty, sonyń ishinde tyńaıtqyshtardy aldyn ala satyp alýǵa múmkindik beredi.