Astanada Respýblıka kúni merekesine jáne «Elorda Aqparat» medıaholdıngine qarasty «Astana aqshamy» men «Vechernáá Astana» gazetteriniń 35 jyldyq mereıtoıyna arnalǵan «Obektıvte – Astana aıshyqtary» atty fotokórme ótedi, dep habarlaıdy aqshamnews.kz
Kórmeniń basty maqsaty – táýelsizdik jyldaryndaǵy Astananyń qalyptasý, damý jáne órkendeý jolyn fotoobektıv arqyly kórsetý, sondaı-aq kásibı fotojýrnalıstıka ónerin dáripteý.
Kórmege «Elorda Aqparat» medıaholdıngi quramyndaǵy redaksıalarda qyzmet etetin Sultan Seıitov, Vasılıı Kras jáne Ońalhan Ónerhan syndy fototilshilerdiń eńbekteri qoıylady. Árqaısysynyń týyndylary Astananyń tynys-tirshiligin, sáýlettik kelbetin, tarıhı sátteri men adamdarynyń beınesin sheber jetkizedi.
Kórmege qoıylǵan sýretter elordanyń ár kezeńindegi damý dınamıkasyn: jańa astananyń alǵashqy qurylys sátteri, táýelsizdik jyldaryndaǵy basty tarıhı oqıǵalar, zamanaýı arhıtektýra men mádenı ómir, elorda turǵyndarynyń ómirinen alynǵan reportajdyq sátter beınelengen.
Kórme – elorda jylnamasyn fotoobektıv kózimen sholyp, Astananyń aıshyqty beınesin jańa qyrynan tanýǵa múmkindik beredi.