«Qoǵamdyq baqylaý týraly» Zań jobasynda Nazarbaev zıatkerlik mektepteri men Nazarbev ýnıversıtetiniń jumysyna qoǵamdyq baqylaý ornatý týraly normalar engizilýi múmkin.
Bul týraly Májilistiń Áleýmettik-mádenı damý komıtetiniń tóraǵasy Asqat Aımaǵambetov aıtty, dep habarlaıdy Almaty-akshamy.kz QazAqparatqa silteme jasap.
«Mundaı túzetýdi zań jobasyna depýtattar engizip jatyr. Bizde avtonomdyq bilim berý uıymdary bar. Sonyń ishinde Nazarbaev zıatkerlik mektepteri men Nazarbaev ýnıversıteti osy máselelerde zańmen qamtylýy kerek degen túzetý engizilip otyr. Ony jumys toby qaraıdy. Mysaly, «Samuryq-Qazynanyń» da áleýmettik máselelerge qatysty suraqtary qoǵamdyq baqylaýǵa alynýy kerek degen túzetý usynylyp otyr», - dedi depýtat.
Aıtýynsha, depýtattar bul túzetýdi qoǵamnyń suranysy boıynsha usynyp otyr.
«Avtonomdy bilim berý uıymdarynyń ashyqtyǵy boıynsha, jalpy qoǵamdyq baqylaý máselesi mańyzdy bolǵanyn bilesizder. Qoǵamda kóp suraqtar kóterildi. Depýtattar sonyń negizinde usynys engizip otyr. Qajet bolsa, qoǵamdyq baqylaý ornatylady. Óıtkeni, avtonomdy bilim oryndary degenimizben, olar da búdjetten qarjylandyrylady ǵoı. Depýtattar búdjetten ketip jatqan qarajattyń tıimdiligi boıynsha, basqa da qoǵamdyq baqylaýdy júrgizýge múmkindik bolý kerek dep otyr. Bizdiń jumys toby osynyń bárin qarap, jaqynda núktesin qoıyp, ekinshi oqylymǵa ázirleıdi», - dedi Asqat Aımaǵambetov.