Qazirgi tańda bilim jeke tulǵanyń kásibı damýyn ǵana emes, onyń dúnıetanymy men qorshaǵan álemge kózqarasyn qalyptastyratyn mańyzdy quralǵa aınaldy.
Osy turǵyda ulttyq qundylyqtardy saqtaý men nasıhattaý erekshe mańyzǵa ıe. Halyqtyń mádenı murasy, salt-dástúrleri men nanym-senimderi óskeleń urpaqqa rýhanı tárbıe berýdiń negizi bolýy tıis. Ulttyq qundylyqtardy dáripteý arqyly jastardyń óz mádenıeti men tarıhyna degen qurmeti artyp, olardyń qoǵamdaǵy orny aıqyndalady.
Muhtar Shahanov óziniń «Tórt ana» óleńinde:
Týǵan jeri – túp qazyǵy, aıbyny,
Týǵan tili – máńgi ónege aıdyny,
Jan baılyǵy, salt-dástúri – tiregi,
Qadamyna shýaq shashar únemi.
dep jyrlaǵandaı, ulttyq rýhta tárbıelengen balalar týǵan jerin qadirlep, óz mádenıetine qurmetpen qaraıtyn azamat bolyp qalyptasady.
Ulttyq qundylyqtardy nasıhattaý – jahandaný jaǵdaıynda halyqtyń biregeıligin saqtaýdyń mańyzdy sharttarynyń biri. Bul úrdis mádenı ártúrlilikti qurmetteý qaǵıdattaryna qaıshy kelmeı, toleranttylyq pen ózara syılastyq negizinde júzege asyrylýy tıis. Qazaqstanda barlyq etnostardyń bir shańyraq astynda tatý-tátti ómir súrýi qazaqstandyq patrıotızm ıdeıasyn nyǵaıtýdyń jarqyn úlgisi bolyp tabylady.
Osy maqsatta Almaty qalasy Bilim basqarmasyna qarasty №19 jalpy bilim beretin mektepte 14 naýryz – Kórisý kúnine arnalǵan merekelik shara ótti. Ulystyń uly kúni – Naýryz meıramynyń bastaýy sanalatyn Amal merekesi mektep ujymy men «Medeý aýdanynyń belsendi uzaq ómir súrý ortalyǵy» ókilderiniń qatysýymen atap ótildi.
İs-sharaǵa aýdanymyzdyń ómirge qushtar qarttary arnaıy shaqyrylyp, olar oqýshylarǵa ónegeli ómir joldary týraly áńgimelep, aq batalaryn berdi. Ardagerler taǵdyrdyń túrli synaǵyna qaramastan, ómirlik ustanymdaryn joǵaltpaı, keıingi býynǵa úlgi bolarlyq ǵumyr keshkenin tebirenispen jetkizdi. Oqýshylar da óz tarapynan úlkenderge qurmet kórsetip, jyly lebizderi men shynaıy yqylastaryn bildirdi.
Patrıottyq tárbıeni qalyptastyrý eń aldymen mektep qabyrǵasynan bastalady. Balalardyń boıyna týǵan jerge degen súıispenshilikti sińirý – árbir ustazdyń mindeti. Ulttyq qundylyqtardy nasıhattaý arqyly mádenı muranyń saqtalýyna yqpal etip, jastardy óz tarıhy men mádenıetine qurmetpen qaraýǵa baýlý – basty maqsatymyz.
Bilim berý júıesine ulttyq qundylyqtardy engizý – qoǵamnyń turaqty damýyna, azamattyq jaýapkershilikti qalyptastyrýǵa jáne jahandyq órkenıetpen úılesimdilikke jetýge múmkindik beredi. Bul ustanymdy saqtaý arqyly ǵana biz óz biregeıligimizdi saqtap, eldiń bolashaq damýyna oń úles qosa alamyz.
Kaldybekova Aınash Akylbekovna
№19 jalpy bilim beretin mektep
basshysynyń birinshi sanatty orynbasary