Almatyda Natalá Sas atyndaǵy Memlekettik akademıalyq orys balalar men jasóspirimder teatrynyń aýqymdy jańǵyrtý jumystary jalǵasýda, dep habarlaıdy aqshamnews.kz
Kúrdeli jóndeý kezinde teatrdyń ataqty ujymy qoıylymdaryn qalalyq Oqýshylar saraıynyń jańartylǵan Úlken konsert zalynda qoıady. Bul keńistik tolyqtaı jańartylyp, erekshe akýstıka saqtalyp qaldy: dybys shaǵylystyrýshy tóbe júıesi qaıta ornatylyp, zamanaýı aınalmaly sahna mehanızmderi, jańa kýlısalar, shymyldyq, jaryq jáne dybys qurylǵylary, sondaı-aq, elektrmen qamtý júıesi jańartyldy.
Jańa sahnada alǵash qoıylǵan spektákl – «Kúlsheqyz» ertegisi boldy. Qoıylym kórermenderdiń ystyq yqylasyna ıe boldy.
«Teatr ujymy, bizdiń trýppa jáne kórermenderimiz Almaty qalasynyń ákimi Erbolat Dosaevqa teatr ónerine degen qurmeti men eldegi basty balalar teatryna kórsetken qamqorlyǵy úshin alǵys bildiredi. Ákimdiktiń qoldaýy arqasynda teatrǵa 44 jyldan keıin alǵash ret kúrdeli jóndeý júrgizý týraly sheshim qabyldandy», – dedi Qazaqstannyń halyq artısi, teatr aktrısasy Olga Korjeva.
Oqýshylar saraıyndaǵy qoıylymdarmen qatar teatrdyń tarıhı sahnasynda jóndeý jumystary qarqyndy júrip jatyr: tirek qurylymdar kúsheıtilip, shatyr men qasbeti jańartylýda, sahna, jaryq jáne dybys júıeleri tolyqtaı jańǵyrtylýda. Ǵımarattyń tarıhı kelbetin saqtaý erekshe nazarda: mármár edender, vıtrajdar, mozaıkalar men basqa da sáýlettik elementter qalpyna keltirilýde. Sondaı-aq, ǵımarat múmkindigi shekteýli kórermender úshin beıimdelip jatyr.
Teatrdyń negizgi ǵımaratynyń janynan Kameralyq sahna ornalasatyn bólek ǵımarat salynyp jatyr. Onda SATS COMMUNITY teatr stýdıasynyń synyptary, sheberhanalar jáne grım bólmeleri bolady. Eki korpýsty biriktiretin galereıa salynady.
Jóndeý jumystary 2026 jyldyń shilde aıynda aıaqtalady dep josparlanǵan. Sodan keıin teatr jańa beınesinde — SAS — Zamanaýı óner ortalyǵy retinde kórermenge jol tartady.
Al ázirge súıikti spektáklderdi jańartylǵan Oqýshylar saraıynan kórýge bolady. Kelesi qoıylym — «Bremen mýzykanttary» 22 mamyrda ótedi. Qoıylym kestesin teatrdyń resmı resýrstarynan kórýge bolady.
N. Sas atyndaǵy teatr jańa jáne turaqty kórermenderin asyǵa kútedi. Kıeli sahnada óner máńgi jasaı bermek.