2025 jyldyń 15 mamyrynda Qazaqstan Respýblıkasy Qorǵanys mınıstrliginiń «Áskerı-tehnıkalyq mektebi» RMQK Almaty fılıaly óziniń 25 jyldyq mereıtoıyn atap ótti. Shara barysynda bul mekemeniń elimizdiń qorǵanys qabiletin arttyrýdaǵy eleýli róli men tarıhı joly keńinen atap ótildi, dep habarlaıdy aqshamnews.kz
Almaty fılıalynyń negizi 1938 jyldyń 7 aqpanynda qalanǵan. Sol kezde qurylǵan Almaty avtomobıl-moto klýby bolashaq áskerı-tehnıkalyq mekteptiń alǵashqy nusqasy boldy. Osy onjyldyqtar ishinde klýb 12 myńnan astam júrgizýshi, motoshabandoz jáne tank mehanıkterin daıarlap shyǵardy. Keıin bul baza negizinde radıoklýb, teńiz klýby syndy baǵyttar qosylyp, 1974 jyly Almaty birikken tehnıkalyq DOSAAF mektebi bolyp qaıta quryldy. Radıo klýb 7 000-nan astam radıomamandy, teńiz klýby 3 500 elektr mehanıgi men 1 800 sýasty sheberin oqytyp shyǵardy.
2000 jyldyń 13 maýsymynda QR Úkimetiniń №718 qaýlysyna sáıkes Almatydaǵy áskerı-tehnıkalyq qurylym QR QK ÁTM Almaty fılıaly bolyp qaıta uıymdastyryldy.
1991 jyldan beri bul fılıal 14 296 VS sanatyndaǵy júrgizýshini, 1 011 radıotelegrafısti jáne 1 166 radıolokasıalyq stansıa operatoryn daıyndady. 2013-2024 jyldary aralyǵynda 8 000-nan astam adam áskerı oqytylǵan rezerv baǵdarlamasy boıynsha oqýdan ótti. Búgingi tańda fılıalda atqysh, mergen, pýlemetshi, granatometshi, barlaýshy, UUA (ushqyshsyz ushý apparaty) operatory jáne radıotelegrafıst sekildi mamandyqtar boıynsha áskerı daıarlyq júrgiziledi.
Almaty fılıalynyń basty mısıasy — jastardy áskerı-patrıottyq rýhta tárbıeleý jáne «Qazaqstan joly — 2050» strategıasyn júzege asyrýǵa úles qosý. Mektep jas urpaqty Otanyn qorǵaýǵa, elin súıýge jáne ulttyq qundylyqtardy qadirleýge baýlıdy.
Mereıtoıǵa arnalǵan saltanatty jıynda zapastaǵy polkovnık Álibek Dlımov ujymdy quttyqtap, áskerı kadrlar daıarlaýda atqarylǵan eńbekti joǵary baǵalady.