Almatynyń ómiri mádenı is-sharaǵa tolyqty. Osymen 20-ret uıymdastyrylǵaly otyrǵan «Mýzeı túni» óner men tarıhtyń jarshysyna aınalmaq
Qazaqstan Respýblıkasynyń Ortalyq memlekettik mýzeıinde 17 mamyr kúni keshkisin mádenı mereke — «Mýzeı túni – 2025» ótedi. Bul – halyqaralyq mýzeı kúni qarsańynda dástúrli túrde uıymdastyrylatyn, elimizdiń óneri men baı murasyn qurmetteıtin azamattardy biriktiretin aıtýly is-shara. Bıylǵy «Mýzeı túni» — merekeniń 20 jyldyǵyna oraılastyrylyp otyrǵandyqtan, burynǵydan da mazmundy ári qyzyqty bolmaq.
Almaty óńirlik komýnıkasıalar qyzmetinde ótken brıfıńte mýzeı basshylyǵy atalǵan kúngi is-sharalar baǵdarlamasymen bólisti.
Qazaqstan Respýblıkasynyń Ortalyq mýzeıi almatylyqtar men qala qonaqtaryn tyń dúnıelermen qarsy almaq. 18:00-den 23:00-ge deıin jalǵasatyn «Mýzeı – tarıhtyń aınasy: qazirgi qoǵamdaǵy mýzeıdiń orny» atty mazmundy baǵdarlama kórermender nazaryna usynylady. Osynyń aıasynda áleýmettik, tehnologıalyq jáne ekologıalyq ózgerister beleń alyp otyrǵan zamanda rýhanı ári mádenı dástúrlerdiń mańyzdylyǵy baıandalmaq.
Mýzeıdegi negizgi baǵyttar «Mýzeı – rýhanı oshaq» jáne «Erlik pen memleketshil minez – egiz uǵym» taqyryptarymen órbıdi. Shara barysynda Shoqan Ýálıhanovtyń 190 jyldyǵyna, Nurǵısa Tilendıevtiń 100 jyldyǵyna, sondaı-aq mýzykatanýshylar Ahmet Jubanov pen Ǵazıza Jubanovanyń murasyna arnalǵan kórmeler men tanymdyq dúnıeler ótedi.
«Sol kúni Uly Otan soǵysynyń qaharmandary Mánshúk Mámetova men Boran Nysanbaevtyń memorıaldyq mýzeıleri qatysatyn «Mýzeı sherýi» uıymdastyrylady», – dep habarlady QR Ortalyq memlekettik mýzeıi dırektorynyń mindetin atqarýshy Serjan Barahanuly.
Qonaqtar nazaryna usynylatyn basty sharalar:
• Shoqan Ýálıhanovtyń 190 jyldyǵyna arnalǵan Altynemeldegi Memorıaldyq mýzeı kórmesi;
• M. Kenbaevtyń, músinshi H. Naýryzbaevtyń jáne basqa da óner ıeleriniń 100 jyldyǵyna arnalǵan «Shabyt jańǵyryǵy» atty mereıtoılyq ekspozısıa;
• Sýretshi Iýrıı Proskýrdyń «Kóshpendiniń jan-dúnıesi» atty jeke kórmesi;
• Tóte jazý, latyn jáne kırıllısa grafıkasymen jazylǵan hattardyń poshta markalary, Morze apparaty jáne zamanaýı komýnıkasıa quraldarymen baılanysyn kórsetetin erekshe kórme. Munda Sh. Ýálıhanov, A. Qunanbaev, Á. Marǵulan, M. Áýezov syndy tulǵalardyń hattary men qujattarynyń kóshirmeleri, sondaı-aq qarapaıym halyqtyń E. Ómirzaqovqa, İ. Esenberlınge, M. Ǵabdýllınge jazǵan hattary da kórermen nazaryna usynylady.
Kórmeniń eń erekshe bóligi — mýzeı qoryndaǵy sırek jádigerler qoıylatyn «Qordyń jaýhary» atty ekspozısıa. Sonymen qatar, qonaqtar Gvarnerı men Stradıvarı sheberleriniń óner týyndylarymen tanysyp, klasıkalyq mýzyka men ulttyq aspaptardyń áýezdi sazyna qanyǵa alady.
Budan bólek, Ahmet Jubanov, Ǵazıza Jubanova jáne Nurǵısa Tilendıevtiń memorıaldyq mýzeıleriniń eksponattary da usynylady.
Merekelik baǵdarlama aıasynda mýzeıdiń ǵylymı kitaphanasynda «Bilim júıesin damytý», «Otbasy hrestomatıasy» atty kitap jármeńkesi, sondaı-aq «Ónerdiń qudiretti kúshi» atty qolóner sheberleriniń kórme-jármeńkesi uıymdastyrylady.
«Halyqaralyq mýzeı kúni aıasynda Iran Islam Respýblıkasynyń Almatydaǵy Mádenı ókildigi «Irannyń dástúrli mádenıeti men óneri» atty kórme ótkizedi. Qonaqtar parsy kallıgrafıasymen tanysyp, Isfahannan arnaıy kelgen sheberler — Nafısa Orýdjı, Márıam Jafarı jáne Hosseın Hýshbatenmen tikeleı tildese alady», – dep tolyqtyrdy Serjan Barahanuly.
Sonymen qatar, kelýshilerge restavrasıa boıynsha sheberlik saǵattarǵa qatysý, ǵylymı ınteraktıvterge aralasý, mýzeı kvestteri men tanymdyq oıyndarǵa qatysý múmkindigi de usynylady.
«Mýzeı túni-2025» — Qazaqstannyń baı mádenıetin sezinip, onyń rýhanı murasymen tanysqysy kelgenderdiń tanym-túsinigin arttyratyn tamasha múmkindik.