«Muqaǵalı» fılminiń halyqaralyq premerasy Tallınde ótedi
Aty ańyzǵa aınalǵan qazaq aqyny Muqaǵalı Maqataev ómiriniń sońǵy jyldary týraly baıandaıtyn «Muqaǵalı» kórkem fılmi 2021 jylǵy 12-28 qarashada Estonıada ótetin mereıli 25-shi Tallın kınofestıvaliniń «Kúńgirt túnder» (PÖFF) negizgi konkýrstyq baǵdarlamasyna engizildi, dep habarlaıdy Almaty-akshamy.kz
Bul týraly «Qazaqfılm» kınostýdıasynyń prezıdenti Aqan Sataev túsirilim tobynyń qatysýymen Almatyda ótken fılmniń tusaýkeseri kezinde málimdedi. Kınostýdıanyń baspasóz qyzmetiniń málimetinshe, is-sharaǵa Muqaǵalı Maqataevtyń uly men kelini – Juldyz jáne Baqytkúl Maqataevtar da qatysty, olar shyǵarmashylyq ujymnyń atqarǵan jumystary úshin alǵys bildirip, aqynnyń 90 jyldyǵyna oraı shyǵarylǵan mereıtoılyq medaldardy tabys etti.
«A» sanatyndaǵy «Kúńgirt túnder» kınofestıvali 1997 jyldan beri ótkizilip keledi. Bul – Baltyq jaǵalaýyndaǵy eń úlken festıvál jáne Shyǵys Eýropadaǵy eń iri kıno kórsetilimderdiń biri. Festıváldi uıymdastyrýshylardyń aıtýynsha, bıyl PÖFF-tiń negizgi konkýrstyq baǵdarlamasyna barlyǵy 19 fılm engizilgen. Olardyń arasynda qazirdiń ózinde marapattalǵan fılmder men kóptegen dúnıejúzilik jáne halyqaralyq premeralar bar.
«Biz festıváldiń 25 jyldyq mereıtoıyna tańdalǵan fılmderdi maqtan tutamyz, olar tań qaldyrady ári ózińe jańa nárseni ashýǵa múmkindik beredi jáne júrektiń túbine deıin boılaıdy», – dedi PÖFF dırektory Tıına Lokk.
Aıta keterligi, festıváldiń basty baıqaýynda qazaqstandyq rejıser Ádilhan Erjanovtyń «Ujymdyq ımýnıtet» fılmi de bas júldege talasady. Sonymen qatar, «Jastar fılmi» baıqaý baǵdarlamasynda rejıser Farhat Sháripovtiń «18 kılogers» fılmi bar.
21 qazanda «Muqaǵalı» fılmi jalpyulttyq prokatqa shyqty. Atalǵan fılmdi elimizdiń barlyq kınoteatrlarynan kórýge bolady.