Bir mektepti úzdiksiz 10 jyl basqarǵan adam qaıta konkýrsqa qatysa almaıdy.
Oqý-aǵartý mınıstrligi Qazaqstanda memlekettik mektep dırektoryn taǵaıyndaý tártibine ózgerister engizýdi josparlap otyr, dep habarlaıdy Almaty-akshamy.kz.
Mektep basshylary konkýrs negizinde jumysqa ornalasyp, mindetti sertıfıkattaý men áńgimelesýden ótedi. Bul rette sertıfıkattaýdan ótý úshin test tapsyrmalarynyń sanyn 50-den 48-ge deıin qysqartý josparlanǵan,-dep jazdy informburo.kz.
Sondaı-aq, kelesi sanattarǵa jatatyn úmitkerler sertıfıkattaýdan bosatylady:
- Prezıdenttik kadr rezervine kirgen adamdar;
- Nazarbaev Ýnıversıtetiniń nemese "Bolashaq" halyqaralyq stıpendıasy boıynsha oqýdan ótken sheteldik joǵary jáne joǵary oqý ornynan keıingi bilim berý uıymdarynyń túlekteri;
- Quacquarelli Symonds World University Rankings, Times Higher Education ýnıversıtetteriniń álemdik reıtıńteri boıynsha álemniń úzdik 100 ýnıversıtetinde, álemdik ýnıversıtetterdiń Academic Ranking of World universities Shanhaı reıtıńinde oqyǵan túlekter.
Konkýrs qorytyndysy boıynsha birinshi basshy laýazymǵa bes jyl merzimge taǵaıyndalady. Biraq, bir mektepte bes jyldan eki merzim qyzmet atqarǵan basshy odan keıin qaıta konkýrsqa qatysa almaıdy.
Sondaı-aq, memlekettik mekteptiń birinshi basshylarynyń kadrlyq rezervin jasaqtaý da josparlanyp otyr. Oǵan úmitkerler bir jyl múshe bola alady.
Kadr rezervine irikteýden ótý úshin úmitker kelesi talaptarǵa saı bolýy qajet:
- QR azamaty;
- jas 50 jastan aspaýy kerek;
- joǵary pedagogıkalyq nemese tıisti beıini boıynsha kásiptik nemese joǵary oqý ornynan keıingi bilim;
- keminde úsh jyl pedagogıkalyq jumys ótili;
- pedagog-sarapshydan tómen emes biliktilik sanaty nemese «úshinshi biliktilik sanatty basshysynyń orynbasary» nemese «ekinshi biliktilik sanatty basshysynyń orynbasary» nemese «birinshi biliktilik sanatty basshysynyń orynbasary» nemese «basshy-uıymdastyrýshy» nemese «basshy-menedjer» nemese «basshy-kóshbasshy» biliktilik sanaty bar;
- sottylyǵy joq;
- medısınalyq qarsy kórsetilimderi joq, sondaı-aq psıhıkalyq, minez-qulyq, onyń ishinde psıhoaktıvti zattardy qoldanýyna baılanysty buzylystary (aýrýlarymen) joq, psıhıkalyq densaýlyq salasynda medısınalyq kómek kórsetetin, halyqqa narkologıalyq kómek kórsetetin uıymdarda esepte turmaýy kerek.
«Úmitker magıstr, PhD akademıalyq nemese ǵylymı dárejesi týraly, QR Ǵylym jáne joǵary bilim mınıstrliginiń Ǵylym jáne joǵary bilim salasyndaǵy sapany qamtamasyz etý Komıteti usynǵan Scopus ındeksteıtin jýrnaldarda jarıalanymdary bar pedagogıka nemese beıindik baǵyt boıynsha ǵylym kandıdaty ǵylymı dárejesi týraly, «Bolashaq» baǵdarlamasynyń túlekteri týraly qosymsha aqparatty bolǵan jaǵdaıda usynady», – delingen qujat jobasynda.
Qujat jobasyn jarıa talqylaý merzimi – 19 shildege deıin.