Arystanbek Muhamedıulynyń isin tergeýde jańa derekter ashyldy, dep habarlaıdy Almaty-akshamy.kz.
Sybaılas jemqorlyqqa qarsy is-qımyl agenttigi Ulttyq mýzeı dırektory Arystanbek Muhamedıuly men basqa da tulǵalarǵa qatysty tergeý amaldary jalǵasýda. Kúdiktiler búdjet qarajatyn asa iri mólsherde jymqyrdy jáne laýazymdyq ókilettikterdi teris paıdalandy dep aıyptalyp jatyr.
Tergeý "Altyn adamnyń álem murajaılary boıynsha sherýi" halyqaralyq kórmesin ótkizýge, sondaı-aq "Ulttyq kıeli nysandary men mýzeı qorlaryn jalpy memlekettik 3D-skanerleý" jáne "Ulttyq sıfrlyq kıno-toptamany sıfrlandyrý" jobalaryna bólingen búdjet qarajatyn paıdalaný faktileri boıynsha júrgizilýde.
Budan basqa Arystanbek Muhamedıulynyń Mádenıet jáne sport mınıstri laýazymynda bolǵan kezinde týystarynyń jáne úlestes tulǵalarynyń menshigine "Sý jáne qoldanbaly sport túrleri boıynsha Respýblıkalyq joǵary sport sheberligi mektebi", "Qazaq ensıklopedıasy" aksıonerlik qoǵamy jáne Qazaq ǵylymı-zertteý mádenıet ınstıtýtyn zańsyz berýge qatystylyǵy tekserilip jatyr. Osyǵan baılanysty qamaýda ustaý merzimi 26 qyrkúıekke deıin uzartyldy.
Memleketke keltirilgen zalaldyń aldyn ala somasy shamamen 7 mlrd teńge.
.