Bıyl 25 ákimshilik is qozǵalǵan.
"Pedagog mártebesi týraly" zańnyń arqasynda Qazaqstanda muǵalimderdiń quqyqtaryn buzý sany aıtarlyqtaı azaıdy, dep habarlaıdy Almaty-akshamy.kz Oqý-aǵartý mınıstrligine silteme jasap.
Mysaly, 2021 jyly Bilim salasynda sapany qamtamasyz etý komıtetine «Pedagog mártebesi týraly» zań normalarynyń saqtalmaýy týraly 105 ótinish túsken bolsa, bıyl 67 ótinish tirkelgen.
Muǵalimderdiń quqyqtaryn buzý faktileri boıynsha ákimshilik ister de azaıǵan. Byltyr 56, bıyl 25 ákimshilik is qozǵaldy. Olardyń barlyǵyna tıisti sharalar qabyldandy.
Iaǵnı, 2019 jyly qabyldanǵan zań muǵalimderdi mindetine jatpaıtyn qyzmetterge tartýǵa tyıym salyp, artyq esep berýdi talap etý jáne muǵalimderdiń quqyqtaryn buzǵany úshin jaýapkershilikti qamtamasyz etti.
«Muǵalimderdiń quqyqtaryn buzý faktileri barynsha azaıdy. 2019 jylǵa deıingi jaǵdaı men «Pedagog mártebesi týraly» zań qabyldanǵannan keıingi jaǵdaıdy salystyrýǵa kelmeıdi. Mektepter ákimdikterdiń qaramaǵynda bolǵandyqtan, muǵalimder qoǵamdyq oryndardy tazalaýǵa jıi tartylatyn, olar birqatar is-sharada «massovka» bolatyn, jóndeý jumystaryna qatysyp, kóptegen gazetke jazylatyn, úı-úıdi aralap, basqa da mindetine jatpaıtyn jumysqa tartylatyn. Endi mundaı jaǵdaılar qysqaryp, joıyldy deýge bolady. Barlyq laýazymdy tulǵa birden jaýapqa tartylady. Zań qabyldanǵan alǵashqy jyly myńnan astam ret zań buzylyp, kóp basshyny jazalaýǵa týra kelse, qazir bul kórsetkish kúrt azaıdy», – deıdi QR Oqý-aǵartý mınıstrliginiń Bilim salasynda sapany qamtamasyz etý komıtetiniń tóraǵasy Ernur Dáýenov.