Balalarmen jumys isteı bilý óte mańyzdy.
Ustaz mamandyǵyn tańdap alǵan jastar arnaıy bilim týraly dıplomy bolǵanymen, jumysqa birden ornalasa almaıdy. Olar aldymen táýelsiz testileýden ótý kerek, dep habarlaıdy Almaty-akshamy.kz.
Bilim salasyna engizilgen ózgertýler týraly Qazaqstannyń Bilim jáne ǵylym mınıstri Asqat Aımaǵambetov Facebook paraqshasynda jazdy.
«Pedagogıkalyq baǵytta bilim beretin joǵary oqý oryndarynyń túlekteri úshin mindetti testileý engizildi. Endi daıyndyǵy nashar úmitkerler muǵalim bolyp jumysqa ornalasa almaıdy. Iaǵnı pedagogıkalyq bilim týraly dıplomnyń bolýy endi jumysqa birden ornalasýǵa kepildik bermeıdi. Balalarmen jumys isteı bilý óte mańyzdy jáne jaýapty mindet bolǵandyqtan, aldymen táýelsiz testileýden ótý kerek. Mundaı syrtqy emtıhandy 2021 jyly shamamen 40 myń túlek tapsyrdy. Olardyń ishinde shekti bal jınaǵandar ǵana mektepte jumys isteýge múmkindik aldy. Engizilgen bul jańashyldyq joǵary oqý oryndary jumysynyń sapasyn da kórsetti. 36 ýnıversıtet osy mamandyq boıynsha daıyndaý lısenzıasynan aıyryldy», - dep jazdy mınıstr.
Sonymen qatar mınıstr pedagogterdi jumysqa qabyldaýdyń jańa qaǵıdalary ázirlengenin habarlady.
«Budan bylaı dırektorlardyń óz qalaýy boıynsha muǵalimderdi ózi jumysqa qabyldaýǵa múmkindigi bolmaıdy. Endi naqty krıterııler belgilenip, muǵalimder jumysqa qyzmetiniń nátıjesi men jetistikteri negizinde konkýrs arqyly ornalasady. Bıyl bul rásim sıfrlyq formatqa kóshiriledi», - dep habarlady Asqat Aımaǵambetov.