Prezıdenttiń tapsyrmasy boıynsha memleketke qaıtarylǵan qarajat esebinen Túrkistan jáne Aqmola oblystarynda áleýmettik nysandar salynady, dep habarlaıdy aqshamnews.kz
Zańsyz aktıvterdi qaıtarý jónindegi komısıa «Zańsyz ıemdenilgen aktıvterdi memleketke qaıtarý týraly» zań sheńberinde jumysyn jalǵastyrýda. Barlyq qarajat áleýmettik paıdaly maqsattarǵa odan ári qaıta bólý úshin Arnaýly memlekettik qorǵa jiberiledi.
Úkimet Memleket basshysynyń tapsyrmasy boıynsha Aqmola oblysynyń Zerendi aýylynda quny 2,1 mlrd teńge bolatyn sport keshenin jáne Túrkistan oblysynyń Temirlan aýylynda 890 mln teńge somaǵa mýzyka mektebin salý jónindegi alǵashqy eki áleýmettik jobany iske asyrýǵa Arnaýly memlekettik qordan qarajat bólý týraly sheshim qabyldady.
Bul bastamalar aýyldyq jerlerde bilim berý jáne sporttyq qyzmettermen qamtýdy arttyrý maqsatynda áleýmettik ınfraqurylymdy damytýǵa baǵyttalǵan.
Máselen, Aqmola oblysynyń Zerendi aýylynda aýdany 6 myń m² asatyn, bir aýysymda 80 adamdy qabyldaı alatyn sport keshenin salý josparlanyp otyr. Nysan belsendi turǵyndarǵa bos ýaqytyn tıimdi ótkizýge múmkindik beredi – aýdanda 14,5 myńnan astam adam júıeli túrde sportpen shuǵyldanady.
Jobaǵa sáıkes, ortalyqta kúres, boks, shańǵy tebý sıaqty sport túrlerimen aınalysýǵa arnalǵan jabdyqtar ornatylady, 2 jattyǵý zaly qajetti qural-jabdyqtarmen jabdyqtalady. Sondaı-aq keshende sportshylardy jattyqtyrý men saýyqtyrý jumystaryn sapaly ári tıimdi júzege asyrý úshin qajetti qural-jabdyqtar men qosalqy úı-jaılar qarastyrylǵan.
Túrkistan oblysyndaǵy Temirlan aýylynda 300 oryndyq jańa óner mektebin salý josparlanyp otyr. 1974 jyly salynǵan qazirgi ǵımarat zamanaýı sanıtarlyq jáne órt qaýipsizdigi talaptaryna saı emes ári kúrdeli jóndeýge jaramsyz. Soǵan qaramastan búgingi tańda keshen jumys istep tur – ortalyqta 420-ǵa deıin bala oqıdy, bul onyń qazirgi qabyldaý múmkindiginen 2 esege artyq, 45 muǵalim sabaq beredi. Jańa joba aýylda óner salasynda qosymsha sapaly bilim alýǵa jaǵdaı jasaıdy. Balalar jaıly ortada mýzykamen jáne horeografıamen aınalysýǵa múmkindik alady.
Búgingi tańda Arnaýly memlekettik qorda 177 mlrd teńge jınaqtalǵan. Bul qarajattyń barlyǵy áleýmettik jáne ınfraqurylymdyq nysandar salýǵa, sondaı-aq densaýlyq saqtaý, bilim berý, buqaralyq sport jáne ózge de áleýmettik mańyzdy jobalardy iske asyrýǵa baǵyttalady.
Zańsyz ıemdenilgen aktıvterdi memleketke qaıtarý máseleleri jónindegi komısıany QR Premer-mınıstri basqarady, al jumys organy – QR Bas prokýratýrasynyń Aktıvterdi qaıtarý jónindegi komıteti.