Sesıa barysynda UQSHU-ǵa múshe memleketterdiń ujymdyq qaýipsizdigin qamtamasyz etýdiń ózekti aspektileri talqylandy. Sonymen qatar uıym qyzmetiniń basty baǵyttary boıynsha bıyl atqarylǵan jumystardyń qorytyndysy jasalyp, aldaǵy kezeńniń jospary aıqyndaldy.
Budan bólek, memleketter basshylary jahandyq kún tártibindegi máseleler jóninde pikir almasty. Qasym-Jomart Toqaev óz sózinde búgingi sesıa halyqaralyq ahýal kúrt nasharlaǵan óte qıyn jaǵdaıda ótip jatqanyna nazar aýdardy. Eýrazıa qurlyǵyndaǵy jáne UQSHU jaýapkershiligine kiretin aımaq tóńireginde kúrdeli jaǵdaı qalyptasyp otyr. Memleket basshysynyń pikirinshe, Taıaý Shyǵystaǵy oqıǵalardyń aýjaıy da erekshe alańdaýshylyq týǵyzady.
– Qaqtyǵystan beıbit halyq zardap shegip otyr. Qanshama jazyqsyz adam, balalar qaza tapty. Mundaıǵa beı-jaı qaraý múmkin emes. Qazaqstan Gaza turǵyndaryna bir mıllıon dollar kóleminde gýmanıtarlyq kómek kórsetti. Qarjy BUU qurylymy – UNRWA/BAPOR uıymy arqyly jiberildi. Qaqtyǵys kezinde bul uıymnyń qyzmetkerleri óte kóp shyǵynǵa ushyraǵanyna qaramastan, jumysyn erlikpen jalǵastyryp jatyr. Taıaý Shyǵystaǵy qaqtyǵys, shyn máninde, jahandyq aýqymdaǵy aqparattyq-ıdeologıalyq teketiresti ábden shıryqtyryp jiberdi. Gaza sektory tóńireginde bolyp jatqan oqıǵalar álemdik qoǵamdastyqty ekige jardy. Soǵys órti barlyq el men kontınentti sharpymaı turǵanda toqtaǵany jón, – dedi Prezıdent.
Sonymen qatar, Memleket basshysy Qazaqstannyń ýaqytsha bitim jasaý týraly sońǵy kelisimdi quptaıtynyn málimdedi
– Biz áýel bastan qaqtyǵysýshy taraptardyń gýmanıtarlyq úzilis jarıalaýy kerek ekenin aıttyq. Olar osy ýaqytty qalyptasqan jaǵdaıdy retteýdiń uzaqmerzimdi sharalaryn ázirleýge paıdalaný úshin bar kúsh-jigerin jumsaýy qajet. Buǵan qosa, BUU aıasynda palestınalyqtarǵa «Eki halyq úshin eki memleket» formýlasyna saı tolyqqandy memleket qurý quqyǵyn bergen jón. Osyndaı qıyn jaǵdaıda BUU Qaýipsizdik Keńesiniń qararyn múltiksiz oryndap, halyqaralyq quqyq normalaryn saqtaý mańyzdy, – dedi Qasym-Jomart Toqaev.
Sonymen qatar Qazaqstan Prezıdenti Aýǵanstandaǵy kúrdeli ahýalǵa nazar aýdaryp, halyqaralyq qoǵamdastyqty aýǵan halqyna kómek berý isin jalǵastyrýǵa shaqyrdy.
– Aýǵan halqyna gýmanıtarlyq kómek kórsetýdi jalǵastyrý jáne taýqymeti kóp osy eldiń óńirlik ekonomıkaǵa ıntegrasıalanýyna yqpal etý mańyzdy dep sanaımyz. Bıyl Qazaqstan Aýǵanstanǵa azyq-túlik, asa qajetti taýarlar men dári-dármek jóneltti. Qazan aıynda Aýǵanstannyń batysynda bolǵan jer silkinisine baılanysty kómek kórsetildi. Gerat qalasyna qutqarýshylar, kınologtar men medısına qyzmetkerleri jiberildi,– dedi Memleket basshysy.