QHR Tóraǵasynyń orynbasary Van Sıshanmen áńgimelesý barysynda Memleket basshysy Qytaıdyń AÓSSHK samıtine osyndaı joǵary deńgeıde qatysýy bizdiń orasan zor kontınentte beıbitshilikti, turaqtylyq pen qaýipsizdikti saqtaý jolyndaǵy ózara senimge negizdelgen seriktestikti nyǵaıtýǵa eleýli úles qosatynyn atap ótti, dep habarlaıdy Almaty-akshamy.kz.
Qasym-Jomart Toqaev keńesti tolyqqandy halyqaralyq uıymǵa aınaldyrý jónindegi Qazaqstannyń bastamasyn qoldaǵany úshin Qytaı tarapyna rızashylyǵyn bildirdi.
Kezdesýde Tóraǵa Sı Szınpınniń ótken aıda Qazaqstanǵa jasaǵan memlekettik saparynyń qorytyndysy boıynsha qol jetkizilgen ýaǵdalastyqtardyń júzege asyrylý barysy talqylandy.
Óz kezeginde Van Sıshan Qasym-Jomart Toqaevqa QHR Tóraǵasy Sı Szınpınniń sálemin jetkizdi jáne Qytaı men Qazaqstannyń saýda-ekonomıkalyq, ınvestısıalyq, kólik-logıstıkalyq, mádenı-gýmanıtarlyq salalardaǵy, ónerkásip kooperasıasy men sıfrlandyrý baǵytyndaǵy ekijaqty qatynastary qarqyndy damyp kele jatqanyn atap ótti.
Van Sıshan eki el arasyndaǵy qarym-qatynas máńgilik dostyq pen ózara senim rýhynda damyp kele jatqanyn aıtty. Qytaı delegasıasy basshysynyń aıtýynsha, Sı Szınpınniń Qazaqstanǵa sapary barysynda qol jetkizilgen ýaǵdalastyqtar sátti júzege asyp keledi.
Sonymen qatar olar óńirlik jáne jahandyq kún tártibindegi ózekti máseleler jóninde pikir almasty.