Qoǵamdyq qaýipsizdikti arttyrý
Búgin Almaty ákimi Erbolat Dosaev Áýezov aýdany jurtshylyǵymen kezdesti, dep habarlaıdy Almaty-akshamy.kz.
Aýdan halqymen kezdesýde shahar basshysy qoǵamdyq qaýipsizdik máselesine, ásirese, Áýezov aýdanyndaǵy jol qaýipsizdigine jeke toqtalyp ótti.
Aǵymdaǵy jyldyń 9 aıynyń qorytyndysy boıynsha, qalada tirkelgen jol-kólik oqıǵalary kólemindegi aýdannyń úlesi 14%-ti qurady. 2620 jol-kólik oqıǵasynyń 375-i osy aýdanda tirkelgen.
«Azamattar ótinishterine júrgizilgen taldaýdy eskere otyryp, Muhamedjanov pen Fýrkat kóshelerindegi kólik quraldary qozǵalysynyń qarqynyn retteý sharalary qabyldandy», - dedi qala ákimi.
Avtomobılderdiń jyldamdyǵyn tómendetý maqsatynda Muhamedjanov pen Isaev kósheleri qıylysyna 2 jasandy jol kedergisi jáne 4 jol belgisi ornatyldy.
Fýrkat kóshesiniń boıyna Tóle bı-SHymbulatov ýchaskesinde jol belgileri qoıylyp, «Toqtaýǵa tyıym salynǵan» belgisi ornatyldy.
Jaıaý júrginshiler qaýipsizdigin qamtamasyz etý maqsatynda jyl basynan beri Jandosov (3), Momyshuly, Shalápın, Altynsarın , Ótegen batyr, Súleımenov kósheleriniń boıyna 9 jańa baǵdarsham ornatyldy.
31 qazanǵa deıin Súleımenov, Jandosov, Shalápın kósheleriniń boıyna taǵy 5 baǵdarsham ornatý jáne iske qosý jumystary aıaqtalady.
«Zań buzýshylyqtyń aldyn alý maqsatynda búginde qoǵamdyq oryndarda 168 beınebaqylaý kamerasy jumys isteıdi.
Beınemonıtorıng júıeleri jelisin keńeıtý úshin, qazan aıynda adamdar kóp jınalatyn oryndarǵa qosymsha 359 kamera, onyń ishinde kóp páterli turǵyn úılerdiń aýlalaryna 275 kamera, mektepter men kolejderdiń janyna 42, jol qıylystaryna 24, alańdar men meshitterge 12, parkter men skverlerge 6 kamera ornatý bastaldy. 2022 jyldyń sońyna deıin barlyq kameralar ornatylady», - dedi Almaty ákimi Erbolat Dosaev.
Kólik quraldaryn júrgizý tártibin jaqsartý úshin, búginde 65 «Sergek» aparattyq-baǵdarlamalyq kesheni (526 kamera) jumys isteıdi.
2023 jyldyń I toqsanynda aýdan kóshelerin 75 «Sergekpen» qosymsha jabdyqtaý josparlanýda.