Qala basshysy aýdan turǵyndaryna óz josparyn aıtty.
Almaty ákimi Erbolat Dosaev Áýezov aýdanyndaǵy áleýmettik ınfraqurylym qalaı damıtynyn jetkizdi, dep habarlaıdy Almaty-akshamy.kz.
«Oqýshy oryndary tapshylyǵyn tómendetý maqsatynda 1 qyrkúıekte №117 jáne 132 mektepterge qosymsha salynǵan 1 725 oryndyq eki japsarjaı paıdalanýǵa berildi, sondaı-aq 4-shi shaǵynaýdanda 400 oryndyq «Dostyq» jekemenshik mektebi ashyldy. Áleýmettik jaýapkershilik sheńberinde qurylys salýshy Everest Development №104 mektepke 400 oryndyq qosymsha qurylys salý úshin jobalaý-smetalyq qujattama ázirleýde. Qurylys-montajdaý jumystary 2023 jyldyń II toqsanyna josparlanǵan», - dedi Erbolat Dosaev.
Qala basshysy Áýezov aýdanynda salynyp jatqan «City plus» jáne «Belkamıt» turǵyn úı keshenderi janynda qurylys salýshy ("Qazaqstroı") 1500 oryndyq eki jańa mektep jáne 800 oryndyq eki balabaqsha salýdy josparlap otyrǵynyn jetkizdi.
«4 mektepte (№122, 127, 141, BIL, osy mekteptegi jalpy oryn sany – 3 686) seısmıkalyq kúsheıte otyryp, kúrdeli jóndeý jumystary jalǵasýda. Jumystar 2023 jyldyń IV toqsanynda aıaqtalady. Mektepke deıingi mekemelerde oryn tapshylyǵyn azaıtý úshin 280 oryndyq eki memlekettik balabaqsha salý josparlanǵan. "Altyn besik" shaǵynaýdanyndaǵy 120 oryndyq birinshi balabaqsha boıynsha qarasha aıynyń sońyna deıin jobalaý-smetalyq qujattama memlekettik saraptamadan ótý satysynda. Qurylys-montajdaý jumystaryn 2023 jylǵy İ toqsanda bastaý josparlanýda. 10-shy shaǵynaýdandaǵy 160 oryndyq ekinshi balabaqsha boıynsha aıtsam, bıylǵy mamyr aıynda qaraýsyz qalǵan balabaqsha ǵımaraty satyp alyndy. Ǵımaratty buzyp, qurylys salýǵa jobalaý-smetalyq qujattama ázirleý úshin 2023 jylǵa qarajat kózdeletin bolady. Bıyl 348 oryndyq 6 jeke menshik balabaqsha ashyldy», - dedi Erbolat Dosaev.
Sonymen qatar qala ákimi emhana qurylysyna toqtalyp ketti.
«Aldyńǵy kezdesýlerde aıtqanymdaı, №18 emhanaǵa adamdar shamadan tys kóp tirkelgen. Osy emhana júktemesin azaıtý úshin "Mamyr-1" shaǵynaýdanynda bir aýysymda 200 adamdy qabyldaıtyn otbasylyq-dárigerlik ambýlatorıa salynýda (merdiger uıym – «Shah» JSHS). Búginde jumystardyń 35%-y aıaqtaldy, qurylysty 2023 jyldyń I toqsanynda bitirý josparlanǵan. Sondaı-aq "Qýanysh" shaǵynaýdanynda bir aýysymda 300 adam qabyldaıtyn №18 emhananyń negizgi ǵımaratyn salý jumystary júrgizilýde. Jýyrda satyp alý úshin jer ýchaskesiniń baǵasy shyǵady, endigi másele – qunyn jerdiń ıesimen kelisý qajet», - dedi qala ákimi.