Prezıdentke kompanıanyń bıylǵy toǵyz aıda atqarǵan qyzmetiniń nátıjeleri tanystyryldy.
Meıirjan Iýsýpov álemdik ýran naryǵyndaǵy qazirgi jaǵdaı, atom energetıkasyn damytý úrdisteri men baǵyttary, sondaı-aq kompanıanyń jahandyq atom ındýstrıasyndaǵy Qazaqstannyń pozısıasyn odan ári nyǵaıtý josparlary týraly málimet berdi, - dep habarlaıdy Aqshamnews.kz.
Ol jasandy ıntellekt tehnologıasynyń qarqyndy damýyna jáne data-ortalyqtardyń energıa tutyný kólemi artýyna baılanysty ýranǵa suranys turaqty túrde ósýi múmkin ekenin aıtty. Buǵan qosa, jańa atom reaktorlaryn jedeldetip salý áserinen álemdik naryqta 2030 jyldan keıin ýran tapshylyǵy sezilýi yqtımal.
«Qazatomónerkásip» geologıalyq barlaý jáne elimizdiń mıneraldyq-shıkizat bazasyn ulǵaıtý jumystaryn júıeli túrde júrgizip jatqanyn baıandady. Bul Joldaýda belgilengen mindetterdi júzege asyrý aıasynda atqarylýda. Atap aıtqanda, bıyl eki jańa ýchaskede jumys bastalǵan. Jalpy aýdany myń sharshy shaqyrymnan asatyn alty ýchaskede geologıalyq barlaý júrgizilýde.
Kompanıa sırek kezdesetin metaldardy óndirý, ǵylymı-zertteý qyzmetin jandandyrý, jasandy ıntellekt tehnologıasyn engizý baǵyttaryn damytýdy josparlap otyr.
2025 jyly qyrkúıek aıynda «Qazatomónerkásip» kompanıasynyń naryqtaǵy kapıtalızasıasy eń joǵary tarıhı mejege jetip, 14 mıllıard dollardan asty. Kompanıa aksıalarynyń quny IPO-ǵa shyqqaly beri 4,5 eseden asa ósti.
Prezıdent resýrs bazasyn odan ári damytýǵa, halyqaralyq yntymaqtastyqty keńeıtýge, sondaı-aq kompanıanyń áleýmettik mańyzy bar bastamalarǵa belsendi atsalysýyna qatysty birqatar tapsyrma berdi.