Prezıdentter áńgimelesý barysynda Qazaqstan jáne Palestına arasyndaǵy dostyq, ózara qurmet pen qoldaýǵa negizdelgen qarym-qatynasty odan ári damytý mańyzdy ekenin atap ótti, - dep habarlaıdy Aqshamnews.kz.
Memleketter basshylary saıası dıalogty nyǵaıtý, saýda-ekonomıkalyq jáne mádenı-gýmanıtarlyq yntymaqtastyqty, sondaı-aq kópjaqty qurylymdar aıasyndaǵy yqpaldastyqty keńeıtý perspektıvasyn talqylady.
Taraptar halyqaralyq kún tártibindegi ózekti máseleler, sonyń ishinde Taıaý Shyǵystaǵy ahýaldy retteý jóninde pikir almasty.
Qazaqstan Prezıdenti «Qos halyq úshin eki memleket» formýlasyna súıene otyryp, aımaqta tezirek beıbitshilik pen turaqtylyq ornatýǵa baǵyttalǵan jahandyq áreketterdi qýattaıtynyn jetkizdi.
Palestına basshysy Mahmud Abbas eli men halqyna udaıy qoldaý kórsetkeni úshin Qasym-Jomart Toqaevqa alǵys aıtyp, Qazaqstannyń álemdegi turaqtylyq pen qaýipsizdikti nyǵaıtý isinde aıryqsha ról atqaratynyna nazar aýdardy.
Qasym-Jomart Toqaev Mahmud Abbasty ózine qolaıly ýaqytta Astanaǵa saparmen kelýge shaqyrdy.