Májilistiń qazirgi zań shyǵarý qyzmeti týraly aqparat berildi.
Qazaqstan Prezıdenti Qasym-Jomart Toqaev Májilis tóraǵasy Erlan Qoshanovty qabyldady, dep habarlaıdy Almaty-akshamy.kz Aqordanyń baspasóz qyzmetine silteme jasap.
Prezıdentke Parlament Májilisiniń qazirgi zań shyǵarý qyzmeti týraly aqparat berildi. Atap aıtqanda, Májilis depýtattary «Adam quqyqtary jónindegi ýákil týraly», «Konstıtýsıalyq sot týraly», «Prokýratýra týraly» zań jobalaryn, sondaı-aq birqatar konstıtýsıalyq jáne basqa da zańdarǵa engiziletin ózgeristerdi qarastyryp, Senatqa joldady. Atalǵan qujattardy talqylaýǵa sarapshylar toby qatysty jáne qoǵam men BAQ úshin jarıa túrde ótti.
Palata maquldaǵan zań jobalary bıylǵy 5 maýsymda ótken referendýmda halyq daýys bergen konstıtýsıalyq reformalardyń negizgi erejelerin júzege asyrýǵa baǵyttalǵan. Engiziletin zań normalary azamattardyń konstıtýsıalyq quqyqtarynyń qorǵalýyn kúsheıtýge jáne turǵyndardyń elimizdiń saıası ómirine aralasý múmkindigin keńeıtýge septigin tıgizedi.
Erlan Qoshanov Qasym-Jomart Toqaevqa parlamenttik dıplomatıa jáne shet memleketterdiń zań shyǵarýshy organdarymen aradaǵy is-áreketter aıasyndaǵy jumystardyń negizgi basymdyqtary týraly aıtty.
Májilis tóraǵasy Memleket basshysyna Túrkıanyń Iznık qalasynda ótken IV Dúnıejúzilik kóshpendiler oıyndarynyń saltanatty ashylý rásimine elimizdiń delegasıasynyń qatysqany jóninde baıandady. Túrki qoǵamdastyǵy V Dúnıejúzilik kóshpendiler oıyndaryn 2024 jyly Qazaqstanda ótkizý jónindegi usynysty biraýyzdan qoldady.