Memleket basshysy aldymen Shrı-Lanka Prezıdenti Ranıl Vıkramasınghemen kezdesti
Kezdesý barysynda Memleket basshysy eki el arasynda ózara qoldaýǵa jáne mazmundy saıası dıalogqa negizdelgen berik seriktestik qatynas ornaǵanyn atap ótti. Qazaqstan Prezıdenti saýda jáne ınvestısıalyq baılanystardy odan ári jandandyra túsý úshin úkimetter deńgeıinde pármendi sharalar qabyldaý qajet ekenine toqtaldy. Sonymen qatar Qasym-Jomart Toqaev vıza rejımine qatysty sharttardy jeńildetý jáne eki el arasynda tikeleı ári turaqty áýe reısterin ashý mańyzdy ekenine nazar aýdardy.
Taraptar halyqaralyq uıymdar aıasynda, atap aıtqanda BUU deńgeıinde ózara yqpaldastyqtyń mańyzdy aspektilerin talqylady. Memleket basshysy Shrı-Lanka Prezıdentin kelesi jyly ótetin Astana halyqaralyq forýmyna qatysýǵa shaqyrdy.
Munan keıin Qasym-Jomart Toqaev HMS Bergbau AG kompanıasynyń basqarma tóraǵasy Dennıs Shvındti qabyldap, Qazaqstannyń sheteldik ınvestorlardy qoldaıtynyn jáne jobalardy tabysty iske asyrý úshin qolaıly jaǵdaı jasaıtynyn atap ótti. Prezıdent álemniń damyǵan elderiniń ekonomıkasy tarapynan lıtııge suranys artyp kele jatqanyna nazar aýdaryp, sırek kezdesetin metaldardy óndirý jáne qaıta óńdeý yntymaqtastyqty damytýdyń asa mańyzdy baǵyttarynyń biri ekenin aıtty. Memleket basshysy taý-ken óndirý ónerkásibine qolaıly retteý ekojúıesin qalyptastyrý úshin Qazaqstan bar kúsh-jigerin jumsaıtynyn jetkizdi.
HMS Bergbau AG basshysy Shyǵys Qazaqstan oblysynda lıtıı óndiretin jáne ony qaıta óńdeıtin ken baıytý kombınatyn salý jobasyn tanystyrdy. Onyń aıtýynsha, josparlanǵan ınvestısıanyń jalpy somasy – 500 mıllıon dollar. Qasym-Jomart Toqaev mundaı ınvestısıalyq jobalardyń el ekonomıkasy men onyń álemdik arenadaǵy básekege qabilettiligin qoldaý úshin mańyzdy ekenin atap ótti.
HMS Bergbau AG – Germanıadaǵy qatty paıdaly qazbalardy barlaýmen jáne óndirýmen aınalysatyn jetekshi táýelsiz kompanıalardyń biri. Bul kompanıa AQSH, Sıngapýr, OAR, Indonezıa, Polsha, BAÁ, Botsvana memleketterinde shıkizat óndirý jumystaryn belsendi júrgizedi. Sondaı-aq onyń Qytaıda, Úndistanda, Kenıada, Malaızıada, Pákistanda, Shrı-Lankada, Bangladeshte jáne Vetnamda ókildikteri bar.
Prezıdent HHLA kompanıasynyń basqarma tóraǵasy Angela Tıtsratpen kezdesý barysynda Qazaqstan men Germanıanyń kólik-logıstıka salasyndaǵy yntymaqtastyǵyn nyǵaıtý perspektıvalary talqylandy. Memleket basshysy Germanıanyń kólik jáne logıstıka salasyn damytýda atalǵan kompanıanyń mańyzdy ról atqaratynyn aıta kele, onyń elimizde fılıal ashý týraly sheshimin quptady. Qasym-Jomart Toqaev bul salanyń Qazaqstan úshin strategıalyq mańyzy zor ekenin aıtty. Óıtkeni elimiz Eýrazıadaǵy basty tranzıt toraby retinde óz pozısıasyn kúsheıtýge nıetti. Áńgimelesý barysynda Qazaqstan qurǵaq jáne suıyq júkterdi tasymaldaýǵa arnalǵan jańa tankerler satyp alý, sondaı-aq Kaspıı teńizindegi Aqtaý jáne Quryq porttaryn jańǵyrtý úshin qarjy tartýǵa múddeli ekeni atap ótildi.
HHLA – jetekshi eýropalyq logıstıkalyq kompanıa. Kásiporyn Gambýrg, Odessa, Tallınn, Trıest qalalaryndaǵy teńiz porty termınaldaryna, sondaı-aq olarmen baılanystyrylǵan Ortalyq jáne Shyǵys Eýropadaǵy ıntermodaldyq toraptar jelisine ıelik etedi.
Sondaı-aq, Memleket basshysy joǵary sapaly dári-dármek óndiretin jetekshi kompanıalardyń biri, álemniń 120 elinde satatyn STADA Group kompanıasynyń vıse-prezıdenti Krıstos Gallıspen kezdesti.
Kezdesý barysynda densaýlyq saqtaý jáne farmasevtıka salalaryndaǵy yntymaqtastyq perspektıvalary talqylandy.
Qasym-Jomart Toqaev STADA kompanıasy densaýlyqqa qajetti tutyný taýarlary segmentinde Qazaqstan naryǵyndaǵy kóshbasshylardyń úshtigine kiretinin atap ótti. Prezıdenttiń aıtýynsha, Almaty qalasynda kompanıa keńsesiniń ashylýy – tabysty jáne qarqyndy damyp kele jatqan yntymaqtastyqtyń aıqyn dáleli. Memleket basshysy Qazaqstanda bıotehnologıalyq klaster qurý jumysy belsendi júrgizilip jatqanyna nazar aýdardy. Prezıdenttiń pikirinshe, QazBioPharm ulttyq holdıńimen ǵylymı-zertteý jáne óndiris salasynda birlese jumys isteý úshin STADA kompanıasyna zor múmkindik ashylady. Qasym-Jomart Toqaev germanıalyq kompanıany birlesken zertteýler júrgizip, ázirlemeler daıyndaýǵa, óndiristi uıymdastyrýǵa, sondaı-aq tájirıbe almasýǵa jáne mamandardyń biliktiligin arttyrýǵa shaqyrdy.
Krıstos Gallıs yntymaqtastyqty nyǵaıtýǵa qyzyǵýshylyq tanytyp, kompanıanyń Qazaqstandaǵy medısınalyq jobalar men baǵdarlamalarǵa ınvestısıa quıý múmkindikterin qarastyrýǵa daıyn ekenin atap ótti.
Ekonomıkalyq yntymaqtastyqty odan ári nyǵaıtý, sonyń ishinde qarjylyq saqtandyrý salasynda birlesken jobalardy ázirleý, tájirıbe almasý jáne oqý baǵdarlamalaryn uıymdastyrý múmkindikteri týraly Qasym-Jomart Toqaev Euler Hermes agenttiginiń basqarma múshesi Edna Shónemen kezdesýi barysynda talqylady.
Memleket basshysy Euler Hermes agenttiginiń Qazaqstan úshin mańyzdy seriktes ekenine nazar aýdardy. Kompanıa kredıtti saqtandyrý isinde jahandyq kóshbasshy sanalady jáne keshendi qarjylyq sheshimder jasaıtyn álemdegi eń iri kompanıalardyń biri – Allianz Group tobynyń quramyna kiredi.
Qasym-Jomart Toqaevqa Qazaqstan damý banki men Helaba banki arasynda Qarjylyq yntymaqtastyq týraly kelisimge qol qoıylǵany jóninde málimet berildi. Atalǵan kelisimge sáıkes AltynAlmas Reagents kompanıasynyń sıanıd natrıı óndiretin hımıalyq zaýytynyń qurylysyna 100 mıllıon evroǵa deıin qarjy bólý qarastyrylǵan.
