Oqý jylynyń qarsańynda shaharda «Mektepke jol» respýblıkalyq aksıasy belsendi túrde ótýde.
Qaıyrymdylyq jobasynyń maqsaty – az qamtylǵan jáne kóp balaly otbasylardan shyqqan oqýshylarǵa qoldaý kórsetý, ata-anasynyń qamqorlyǵynsyz qalǵan balalarǵa naqty kómek kórsetý bolyp tabylady. Aksıaǵa qala kásipkerleri, máslıhat depýtattar, qaıyrymdylyq qorlary kómek qolyn sozýda. Almaty qalasy máslıhatynyń depýtaty Erbolat Qasymov ta bul sharadan shet qalmaı, oqýshylarǵa qajetti quraldardy tabys etti. İs-shara Nur Otan partıasynyń qalalyq fılıalynda ótti. Onda kómekke muqtaj oqýshylarǵa mektepke qajetti quraldar tabystaldy.
«Biz rúkzaktar men keńse taýarlarynan basqa, oqýshylarǵa otandyq óndirýshiden mektep formasyn satyp alýǵa sertıfıkattar usyndyq. Eger biz tabystaǵan formalar mindetti bolyp tabylmasa, olar kelesi jyldyń sońyna deıin jaramdy bolady», – deıdi máslıhat depýtaty Erbolat Qasymov.
Onyń aıtýynsha, bıyl kómekke júgingen balalardyń jalpy sany – 114. Olardyń barlyǵyna derlik kómek kórsetildi. Karantındik shekteýlerge baılanysty bul rásimge tek 16 bala qatysqan. Degenmen qalǵandary oqý jylynyń basynda, ıaǵnı tamyz aıynyń aıaǵyna deıin qajettiniń bárin ala alady dedi. Ata-analar depýtattarǵa osyndaı qamqorlyq úshin rızashylyǵyn bildirdi, óıtkeni olardyń kópshiligi óz betinshe balalarynyń qajettilikterin óteı almaıtyndyǵyn aıtty. Sebebi, bir otbasynda keminde 3 balanyń mektepke baratynyn, árqaısysyna jabdyqtar alý qomaqty qarjyny talap etetinin aıtyp aǵynan jaryldy.
– Men bul aksıany uıymdastyrǵandarǵa jáne oǵan qatysatyndardyń barlyǵyna alǵys aıtamyn. Biz, ata-analar, shynymen de osyndaı kómekke muqtajbyz. Ulym jańa oqý quraldaryna óte rıza jáne oqý jylynyń bastalýyn asyǵa kútýde, – dep qýanyshymen bólisti almatylyq Dınara Qasymjan.
Uıymdastyrýshylarǵa Elena Gogýlına da erekshe rızashylyǵyn bildirdi.
– Shynymdy aıtsam, men partıadan basqa másele boıynsha kómek suradym, biraq meniń otbasylyq jaǵdaıymdy bilgennen keıin olar maǵan oqý quraldaryn satyp alýǵa kómektesti, sol úshin bárine úlken rahmet, – deıdi Elena Gogýlına.