Almatynyń Medeý aýdanynda syrtqy jaryqtandyrý júıesin jańǵyrtý jalǵasyp jatyr. Bıyl jyl sońyna deıin aýdannyń barlyq kóshesi, ortalyq jáne jeke aýmaqtar, sonyń ishinde baý-baqsha seriktestikteri de jaryqtandyrylady. Bul týraly aýdan ákimi Erkebulan Orazalın Óńirlik komýnıkasıalar qyzmetinde ótken baspasóz máslıhaty barysynda aıtty.
"Medeý aýdanyndaǵy jaryqtandyrylmaǵan kósheler men baý-baqsha seriktestikterinde jańa syrtqy jaryqtandyrý jelilerin salý" jobasy aıasynda 2 598 sham men 33 basqarý shkafy ornatylyp jatyr. Jańa jelilerdiń uzyndyǵy 70 shaqyrym. Búginde 114 ýchaskeniń 100-inde jumys aıaqtalǵan.
Sondaı-aq, turǵyn úılerdiń qasbetin sáýlettik jaryqtandyrý jumystary júrgizilip jatyr. Bul jumys 75 úıdi qamtıdy, onyń 69-y aǵymdaǵy jóndeýden ótip jatyr, al 51-i sándik shamdarmen tolyq jaryqtandyrylady. Mundaı jaryqtandyrý ál-Farabı jáne Dostyq dańǵylynda, Pýshkın, Joldasbekov jáne Raıymbek batyr kóshelerinde júzege asyrylady.
Atqarylǵan jumystar Medeý aýdanynda kóshe jaryǵyn júz paıyz qamtýmen qatar, keshki ýaqytta qaýipsizdik deńgeıin arttyrýǵa jáne jaıly qalalyq orta qurýǵa yqpal etedi.