Almatynyń Medeý aýdanynda Qaldaıaqov kóshesi, 93/95 mekenjaıyndaǵy aýlada abattandyrý jumysy aıaqtaldy. Endi bul turǵyndarǵa serýendep, oınap jáne otbasymen demalýǵa qolaıly zamanaýı aýmaq. Bıyl bul baǵdarlama aıasynda Medeý aýdanynda barlyǵy 46 aýla jańartyldy.
Jumys "Halyq qatysatyn búdjet" jobasy aıasynda júzege asty. Bul bastama qala turǵyndaryna aýdandaryndaǵy abattandyrýdyń basym baǵyttaryn ózderi aıqyndaýǵa múmkindik beredi.
Jańarǵan aýlada avtomatty sýarý júıesi ornatylyp, berik rezeńke jabyn men jańa kógal tóseldi, tas tóseýishter aýystyryldy. Eski nysandardyń ornyna balalarǵa arnalǵan keshen, átkenshek, vorkaýt jáne kóshe trenajerlary syndy zamanaýı oıyn jáne sport alańdary salyndy. Fýtbol alańynyń qorshaýy jańartylyp, jaryq shamdary men tirekter ornatyldy, aǵashtyń butaqtary sanıtarlyq maqsatta kesildi. Sonymen qatar demalýǵa arnalǵan kúrke men átkenshekter de jóndelip, jańardy.
Turǵyndardyń aıtýynsha, aýla aýdan turǵyndarynyń súıikti ornyna aınalǵan.
"Bizdiń aýla tanymastaı ózgerdi. Barlyǵy zamanaýı ári ádemi. Balalar tańnan keshke deıin alańda oınaıdy, eresekter demalýǵa arnalǵan kúrke mańynda jınalady, keshke jaryq ári jaıly serýendeýge bolady", – deıdi qala turǵyny Andjela Chekmareva.
Medeý aýdanynyń ákimdigi aýlalardy kóriktendirý jumystary jalǵasatynyn aıtady.