Jelide Almaty oblysy Talǵar aýdanyndaǵy mektepterdiń biriniń basshylyǵy muǵalimderden aqsha jınap jatyr degen aqparat tarady, dep habarlaıdy aqshamnews.kz
Jelide taraǵan vıdeoda mektep basshylyǵy muǵalimnen aldaǵy semınardy uıymdastyrýǵa kómektesýin ótinedi.
Áıel naqty qandaı kómek kerek ekenin suraǵanda, áńgimelesýshi ár muǵalimnen 2 myń teńgeden jınaýdy usynady jáne basqa mektepterdiń kópshiligi bul aqshany áldeqashan tapsyryp qoıǵanyn aıtady. Alaıda áıel qarjylyq jaǵdaıyna baılanysty bul iske atsalysa almaıtynyn túsindiredi.
Vıdeo jarıalanǵan soń óńirdiń bilim basqarmasy tekserý júrgizdi. Oqıǵa Talǵar aýdanyndaǵy №8 mamandandyrylǵan mektepte bolǵan.
Bilim basqarmasy áleýmettik jelilerde taraǵan «№8 mamandandyrylǵan mektep muǵalimderinen aqsha jınalyp jatyr» degen aqparatty tekserdi. Aqsha jınaý týraly derek rastalmady. Alaıda mektep dırektory áriptesterine 2025 jyly 17 qazanda ótetin fızıka páni muǵalimderine arnalǵan semınarǵa banner daıyndaýǵa jáne oqý robotyn jalǵa alýǵa kómektesýdi usynǵan, - delingen Almaty oblysy ákimdiginiń baspasóz qyzmeti taratqan habarlamada.
Tekserý qorytyndysy boıynsha mektep dırektoryna QR Eńbek kodeksiniń 64-baby boıynsha qatań sógis túrindegi tártiptik jaza qoldanyldy.
Eske salaıyq, buǵan deıin muǵalimder quqyǵy jıi buzylatyn 5 oblys belgili bolǵan edi.
Bilim salasynda sapany qamtamasyz etý komıtetiniń tóraǵasy Serik Áshirovtiń aıtýynsha, Qostanaı, Almaty, Abaı, Jambyl jáne Pavlodar oblystarynda áli de buzýshylyqtar bolyp jatyr. Olar kóp jaǵdaıda pedagogke tán emes jumystarǵa tartý boıynsha, pedagogterdiń ar-namysyna tıý, ıaǵnı balaǵattaý boıynsha, konsert bıletterin satyp alýǵa jáne ártúrli sharalarǵa kórermen retinde qatysýǵa májbúrleý boıynsha tirkelgen.