Bıyl Medeý aýdanynda jańa oqý oryndaryn qurý jáne jumys istep turǵan mektepterdiń jaǵdaıyn jaqsartý boıynsha júıeli jumys jalǵasyp keledi. Sońǵy jyldary aýdan mektepterinde 4 368 oqýshy orny jetispegen. Aýdan ákimi Erkebulan Orazalın Óńirlik komýnıkasıalar qyzmetinde ótken baspasóz máslıhatynda bul máseleni sheshý aýdan ákimdiginiń basym baǵyttarynyń biri ekenin aıtty.
Bıyl №220 mekteptiń 2 000 orynǵa arnalǵan jańa ǵımaraty, Nazarbaev Zıatkerlik mektebine 320 oryndyq qosymsha nysan jáne 599 oryndyq «Joo School Medeu» jekemenshik mektebi paıdalanýǵa berildi. Sonymen qatar, №99 (250 oryn) jáne №35 (300 oryn) mektepterine qosymsha ǵımarattar salý jumystary aıaqtalýǵa jaqyn. Osylaısha, bıyl aýdan boıynsha 3 469 jańa oqýshy orny ashylady.
Budan bólek, 2026 jyldyń sońyna deıin taǵy bes joba júzege asyrylmaq: №30, №56 jáne №17 mektepterine kúrdeli jóndeý júrgizý, №131 mektep-lıseıin 300 orynǵa salý jáne 1 200 oryndyq «MG City» bilim berý keshenin turǵyzý josparlanǵan. Sondaı-aq, №168 jáne №47 mektepterge arnalǵan jobalyq-smetalyq qujattama ázirlenip jatyr, olardyń árqaısysy 300 orynǵa eseptelgen.
Osylaısha, Medeý aýdany oqýshy oryndarynyń tapshylyǵyn kezeń-kezeńimen sheship, balalardyń zamanaýı mektepterde jaıly jaǵdaıda bilim alýyn qamtamasyz etedi.