7 mlrd teńgelik muranyń tizimi shyqty.
Aleksandr Mashkevıchtiń muragerlerine tıesili AQSH-taǵy mıllıardtaǵan aqsha turatyn múlik týraly derekter jarıalandy, dep habarlaıdy aqshamnews.kz
Telegram-daǵy "Vyhod k morú" arnasynyń málimetinshe, Eurasian Resources Group-tyń marqum atqarýshy ıeleriniń biri Aleksandr Mashkevıchtiń muragerlerine tıesili kompanıalar Maıamıdegi aralda 7 mıllıard teńgelik jyljymaıtyn múlikke ıe. Olardyń kórshileri qatarynda álemdik juldyzdar men reseılik olıgarhtar bar.
Maıamı-Deıd okrýgi ákimshiliginiń derekterine súıensek, Fısher-Aılend aralynda 40 elden 700-ge jýyq otbasy jyljymaıtyn múlik ıeleri retinde tirkelgen. Araldyń tanymal turǵyndary qatarynda Djýlıa Roberts, Opra Ýınfrı, Mel Brýks, sondaı-aq reseılik mıllıarderler Vıktor Vekselberg pen Araz Agalarov, sondaı-aq jumbaq jaǵdaıda kóz jumǵan grýzıalyq kásipker Badrı Patarkasıshvılıdiń týystary bar.
Aqparat kóziniń málimetinshe, marqum olıgarhtyń qyzy Anna bul jerde birden úsh kompanıany basqarady – Alm Florida Property Inc, Alm Florida Property II Inc jáne Alm Florida Property III Inc. Bul kompanıalardyń túpkilikti benefısıarlary retinde Lúksembýrgte tirkelgen zańdy tulǵa arqyly Aleksandr Mashkevıch pen onyń jubaıy Larısa kórsetilgen. Olar 13, Fisher Island Drive mekenjaıyndaǵy kondomınıýmda eki páterge ıe. Olardyń biri (shyn máninde, bir keńistikke biriktirilgen eki apartament) 2008 jyly polák kásipkeri Ryshard Kraýzeden 3,5 mıllıon dollarǵa satyp alynǵan, qazirgi baǵasy – 9,5 mıllıon dollar.
Osy úıdegi taǵy bir Mashkevıchterge tıesili páterdiń quny – 3,5 mıllıon dollar, alaıda aýdany aldyńǵysynan eki ese kishi. Sondaı-aq otbasynyń ıahta aılaǵynyń dál janynda, 40207 Fisher Island Drive mekenjaıynda ornalasqan shaǵyn páteri bar. Aýmaǵy nebári 50 m² bolatyn bul baspana 1 mıllıon dollarǵa baǵalanyp otyr.
Búgingi tańda Mashkevıchterdiń araldaǵy jyljymaıtyn múlkiniń jalpy quny shamamen 14 mıllıon dollardy nemese 7 mıllıard teńgeden asady.